23:767  767  SERMONS.  768  profiteroit  ma  mort?  Et  quand  ie  me  feray  tuer  on  n'en  parlera  plus  au  bout  de  trois  iours,  mesmes  cela  ne  fera  qu'apporter  scandale  a  plusieurs.  Car  beaucoup  diront:  Or  il  se  fust  bien  passe  de  cela:  nous  estions  a  repos,  on  ne  nous  demandoit  rien,  et  voici  maintenant  une  persecution  esmeue,  voila  qu'il  a  profite  de  s'avancer  ainsi.  Voire  :  mais  Dieu  n'a-il  rien  entendu  quand  il  a  voulu,  et  qu'il  a  commande  qu'on  luy  fist  sacrifice  de  la  confession  de  foy,  et  qu'il  a  voulu  qu'on  mesprisast  sa  vie  [pag.  271]  pour  l'honneur  de  son  sainct  nom?  Ne  savoit-il  pas  bien  ce  qui  devoit  advenir?  Et  pensons-  nous  estre  plus  sages  et  advisez  que  luy?  Et  ainsi  ce  n'est  point  sans  cause  que  i'ay  dit,  que  nous  devons  retenir  ceste  doctrine  entre  autres,  quand  il  est  dit:  Mon  fils,  Dieu  se  pourvoira  d'un  sacrifice:  car  c'est  autant  comme  si  nous  estions  exhortez  par  le  sainct  Esprit  de  ne  point  estre  trop  discrets  (comme  on  dit)  et  de  n'estre  point  trop  provoyables  pour  disputer.  Et  comment?  Que  se  pourroit-il  faire?  mais  que  nous  ayons  cela  tout  resolu  que  Dieu  a  parle,  et  il  sait  comme  il  peut  besongner.  Adviene  donc  ce  qu'il  pourra,  car  il  est  certain  que  tout  ira  bien  quand  il  sera  nostre  conduite.  Mais  cependant  si  faut-il  que  nos  sens  defaillent  en  cest  endroit,  et  que  nous  soyons  comme  aveugles  volontaires:  c'est  a  dire,  que  nous  ne  soyons  pas  si  aigus  que  ces  sages  mondains,  qui  veulent  tout  cognoistre  et  tout  iuger,  iusques  a  contreroler  ce  que  Dieu  doit  faire:  ne  que  nous  luy  ravissions  ce  qui  est  sien,  mais  qu'il  nous  suffise  de  nous  aquitter  de  nostre  devoir.  Voila  donc  comme  la  foy  ne  peut  estre  sans  que  nous  devions  la  Providence  de  Dieu:  et  le  moyen  de  l'elever,  c'est  que  nous  luy  remettions  tout  ce  qui  ne  peut  sinon  nous  engendrer  scrupules,  nous  entortiller  en  beaucoup  [pag.  272]  de  perplexitez:  que  brief,  nous  puissions  dire,  Seigneur,  que  tu  me  conduises  comme  il  te  plaira:  car  de  moy  ie  suis  un  povre  aveugle,  et  ne  faut  pas  aussi  que  ie  voye  en  cest  endroit,  car  ce  seroit  comme  un  abysme  profond  pour  me  precipiter  quand  ie  me  voudroye  conduire  moy-mesmes.  Voila  donc  la  vraye  sagesse  que  doyvent  avoir  tous  enfans  de  Dieu,  c'est  de  n'estre  point  trop  sages:  mais  de  se  contenter  de  leur  mesure:  et  quand  ils  voyent  le  chemin  qui  leur  est  monstre,  qu'ils  marchent:  et  s'ils  ne  peuvent  parvenir  a  leur  but  du  premier  coup,  qu'ils  ne  laissent  pas  toutesfois  de  tousiours  continuer.  Que  s'ils  voyent  comme  des  montagnes  pour  les  arrester,  qu'il  y  ait  comme  une  mer,  qu'il  semble  que  leur  gouffre  soit  prochain:  qu'ils  surmontent  tout  cela,  et  qu'ils  cognoissent  que  ce  n'est  pas  en  vain  qu'il  est  escrit,  que  Dieu  a  commande  a  ses  Anges  de  nous  conduire  et  addresser,  quand  nous  cheminerons  en  nos  voyes,  c'est  a  dire,  que