23:762  que  nous  apprenions  d'avoir  tous  nos  sens  tellement  retenus  a  Dieu,  que  quand  [pag.  260]  les  hommes  nous  blasmeront  iniustement  nous  ne  soyons  point  destournez  pourtant  pour  flechir:  mais  que  nous  regardions  tousiours  le  chemin  qui  nous  est  propose.  Voila  aussi  que  nous  avons  a  recueillir,  quelle  vertu  il  y  a  eu  en  la  foy  d'Abraham  ,  quand  il  a  este  ainsi  rassis,  qu'il  a  premedite  les  choses  comme  s'il  eust  este  a  son  aise.  Si  nous  avons  quelque  passion,  encores  que  nous  vueillons  bien  faire,  si  est-ce  que  nous  vaguerons  souvent,  et  tellement  eslourdis  que  nous  ne  saurons  par  ou  il  nous  faudra  commencer  ne  quel  ordre  nous  avons  a  tenir.  Nous  le  voyons  en  ceux  qui  sont  les  plus  magnanimes,  qu'encores  eo  perplexitez  ils  n'iront  pas  si  posement  qu'il  seroit  requis.  Or  il  falloit  bien  qu'Abraham  eust  un  esprit  areste  au  milieu  de  toutes  les  fantasies  qui  luy  venoyent  au  devant,  qu'il  pensoit,  Voici  mes  serviteurs  qui  me  pourront  empescher  en  cest  acte,  car  ils  estimeront  que  ie  soye  transporte  de  mon  sens:  il  faudra  au  lieu  de  lier  mon  fils  que  ie  soye  lie,  et  qu'ils  me  ramenent  maugre  que  i'en  aye  en  la  maison,  et  que  ie  soye  la  tenu  comme  une  beste  sauvage,  et  comme  si  Dieu  m'avoit  condamne  du  tout.  Abraham  prevoid  toutes  ces  choses.  Ainsi  nous  pouvons  iuger  par  la,  qu'au  milieu  de  ces  tenebres  il  a  este  esclaire  de  l'Esprit  de  Dieu,  tellement  qu'il  [pag.  261]  a  eu  tousiours  et  conseil  et  discretion  selon  qu'il  en  estoit  de  besoin.  Or  par  son  exemple  nous  sommes  advertis,  quand  nous  aurons  des  passions  grandes  qui  nous  pourroyent  estonner,  en  sorte  que  nous  ne  saurions  de  quel  coste  nous  tourner,  que  nous  prions  Dieu  qu'il  luy  plaise  de  nous  addresser:  et  s'il  y  a  des  confusions  quant  a  nostre  sens  naturel,  que  la  clarte  de  la  foy  qui  nous  est  donnee  surmonte  tellement  que  nous  sachions  quel  chemin  nous  avons  a  tenir.  Or  la  dessus  Moyse  recite,  que  Dieu  a  encores  envoye  une  torture  plus  aspre  a  son  serviteur  Abraham  que  les  autres.  Car  quand  il  marche  avec  son  fils  Isaac,  il  luy  dit,  Mon  pere.  N'estimons  pas  que  ceci  soit  eschappe  de  la  bouche  d'Isaac  de  cas  d'aventure:  mais  Dieu  a  voulu  ainsi  gehenner  la  foy  d'Abraham,  comme  s'il  luy  transpercoit  le  coeur.  Il  n'y  a  rien  qui  pust  apporter  une  telle  angoisse  a  Abraham  que  ce  mot  qui  est  tant  amiable,  de  dire,  Mon  pere.  Voila  donc  comme  un  glaive  qui  est  pour  navrer  mortellement  Abraham:  et  le  tout  (comme  i'ay  dit)  vient  du  conseil  de  Dieu,  lequel  nous  a  ici  voulu  donner  un  patron,  et  un  miroir  de  telle  constance,  que  quand  nous  aurons  a  batailler  contre  toutes  les  tentations  du  monde,  nous  sachions  qu'a  grand'peine  en  aurons-nous  la  centieme  [pag.  262]  partie  de  ce  que  nostre  pere  a  endure  et  qu'il  a  surmonte.  Abraham  luy  respond: