9:76  Cur  enim  mecum  rixetur  Westphalus,  uno  hoc  verbulo  retectum  ac  patefactum  est:  quia  pro  fratribns  non  agnoscit,  nisi  qui  ad  vorandum  Christum  os  et  ventrem  afferunt.  Non  nego  equidem  quin  se  defraudent  usu  coenae  qui  ex  communione  auferunt  substantiam  carnis  et  sanguinis  vivifici.  Tantum  excipio,  perperam  in  nos  coniici  quod  sibi  ex  proprio  cerebro  comminiscitur  Westphalus:  quia  etsi  non  detrahimus  e  coelo  corporis  Christi  substantiam,  ut  nos  vivificet,  multum  tamen  abest,  quin  eam  excludamus  a  coena,  qui  vitam  ex  ea  in  nos  defluere  testamur.  Tertium  caput  est,  veram  praesentiam  corporis  [pag.  69]  et  sanguinis  a  me  negari,  dum  Christi  absentiam  secundum  corpus  induco.  Dabunt  veniam  lectores,  si  ad  refutandum  hominis  garritum  eadem  saepius  iterare  cogar.  Quomodo  non  impediat  locorum  distantia,  quo  minus  adsit  Christus  suis  in  coena,  ante  disserui.  Principium  illud  semper  teneo,  ut  Christo  potiamur,  in  coelo  quaerendum  esse,  non  solum  ne  quid  de  eo  terrenum  imaginemur,  sed  quia  corpus  in  quo  redemptor  apparuit  mundo,  et  quod  semel  in  sacrificium  obtulit,  nunc  coelo  contineri  oportet,  ut  Petrus  testatur.  Spiritus  autem  sui  virtute  divinaque  sua  essentia  non  modo  coelum  et  terram  implere  fateor,  sed  etiam  mirabiliter  nos  sibi  coagmentare  in  unum  corpus,  ut  caro  illa,  quamvis  in  coelo  maneat,  nobis  alimentum  sit.  Ita  Christum  corpore  absentem  doceo  nihilominus  non  tantum  divina  sua  virtute,  quae  ubique  diffusa  est,  nobis  adesse,  sed  etiam  facere  ut  nobis  vivifica  sit  sua  caro.  Nam  quum  arcana  spiritus  sui  gratia  ad  nos  penetret,  non  necesse  est,  ut  alibi  diximus,  ipsum  corpore  descendere.  Reclamat  hic  Westphalus,  me  spiritus  praesentiam  opponere  carnis  praesentiae  :  sed  quatenus  id  faciam  [pag.  70]  ex  eodem  loco  clare  patere  malevolentia  excaecatus  non  inspicit.  Neque  enim  simpliciter  spiritu  suo  Christum  in  nobis  habitare  trado  sed  ita  nos  ad  se  attollere,  ut  vivificum  carnis  suae  vigorem  in  nos  transfundat.  An  non  hic  asseritur  praesentiae  species,  ut  vitam  hauriant  animae  nostrae  a  carne  Christi,  quamvis  illa  locorum  spatiis  procul  a  nobis  dissita  sit?  Westphalo  intolerabilis  est  loquutio,  Christum  in  coelo  totum  manentem  sua  ad  nos  virtute  descendere,  quia  credat  ecclesia,  ubicunque  coena  peragitur,  praesens  esse  eius  corpus:  modo  praesentiae  modum  quem  exposui  amplectatur,  non  dissentio.  Si  vero  Christum,  ut  Numa  Pompilius  suum  Iovem,  e  coelo  elicere  velit,  ipse  sibi  est  ecclesia.  Nam  quod  fatetur  non  versari  nunc  Christum  in  terra,  sicut  suae  dispensationis  tempore,  quorsum  pertinet,  nisi  ut  invisibilis  adhuc  in  terra  habitare  fingatur  ?  Scriptura  quum  de  Christi  ascensu  loquitur,  simul  inde  venturum  pronunciat.  Si  nunc  secundum  corpus  occupat  totum  mundum,  quid  aliud  vel  fuit  ascensus