58:76  Qu'Esau  estant  retourne,  demande  a  son  frere  Iacob  qu'il  lui  donne  du  potage  roux  et  de  ceste  rousseur.  Ce  qu'il  dit  est  comme  par  mespris:  et  toutefois  en  cela  nous  voions  qu'il  n'a  point  este  delicat  ne  mene  de  friandise:  mais  il  n'en  peut  plus,  il  est  tant  las  qu'il  ne  sait  qu'il  fait:  et  pourtant  il  ne  demande  que  d'estre  rassasie.  Sur  cela  il  dit,  Donne-moy:  comme  s'il  disoit:  Ce  m'est  tout  un  que  ie  mange,  soit  pain  blanc,  soit  pain  bis,  moyennant  que  ie  puisse  remplir  mon  ventre,  et  fust-ce  mesme  de  glans,  ce  m'est  tout  un.  On  trouveroit  doncques  ici  quelque  couleur  pour  excuser  Esau:  et  semble  que  cela  lui  devoit  bien  estre  pardonne.  Mais  quoy?  Tant  plus  nous  faut-il  voir  en  cela,  que  nos  appetits,  quelques  naturels  qu'ils  soient,  et  licites,  neantmoins  se  doivent  reprimer,  quand  il  est  question  de  la  vie  celeste:  car  alors  il  nous  faut  mettre  bas  toute  consideration,  et  quitter  plustost  cent  fois  la  vie,  que  de  nous  destourner  du  chemin  de  salut.  Ce  n'est  point  donc  assez,  que  les  hommes  s'abstienent  d'actes  qui  soient  du  tout  meschans  et  dissolus,  et  desquels  ils  puissent  avoir  honte:  mais  encor  qu'un  appetit  qu'ils  auront,  leur  soit  permis  de  Dieu,  qui  ne  soit  point  du  tout  a  condamner,  si  faut  il  encore  qu'il  soit  donte,  quand  on  vient  en  comparaison  des  biens  spirituels.  Mais  de  cela  nous  en  traicterons  encore  tantost  plus  au  long.  Cependant  il  a  falu  noter  ce  poinct:  c'est  assavoir,  qu'Esau  n'a  point  cerche  trop  grandes  delices  :  il  void  ce  potage,  duquel  il  est  fait  ici  mention,  et  ne  demande  sinon  d'en  estre  rassasie.  Or  Iacob  lui  demande  sa  primogeniture  en  payement.  S'il  lui  eust  demandee  par  ambition,  et  qu'elle  ne  lui  eust  point  appartenu,  il  est  certain  que  le  marche  estoit  nul.  D'autre  coste,  la  malice  qu'il  eust  eue,  ne  se  pouvoit  nullement  excuser:  et  puis  c'estoit  faire  un  acte  de  volerie  et  de  brigandage,  de  tenir  ainsi  le  gosier  serre  a  son  frere,  pour  dire,  Si  tu  ne  me  quittes  tout  ce  qui  t'appartient,  ie  ne  te  donneray  point  un  morceau  a  manger,  plustost  que  tu  perisses.  Et  ou  seroit-ce  aller?  Mais  Iacob  ne  demande  rien  a  Esau,  sinon  ce  qui  lui  avoit  desia  este  donne:  car  il  est  enseigne,  qu'avant  que  les  deux  enfans  soient  nais,  desia  l'arrest  a  este  prononce  que  Dieu  avoit  declare  qu'il  faloit  que  le  plus  grand  servist  au  moindre.  Iacob  donc,  quant  au  regard  de  Dieu,  possede  desia  par  foy  la  primogeniture:  il  est  vray  que  cela  ne  lui  sert  de  rien  selon  le  monde:  mais  il  est  question  ici  du  iuste  titre,  qu'il  sait  que  Dieu  l'a  constitue  le  premiernay,  et  a  declare  que  la  primogeniture  lui  appartenoit.  Ainsi  donc,  il  ne  ravit  pas  a  Esau  rien  qu'il  ait:  mais  il  redemande  bien  ce  qui  est  sien:  comme  s'il  disoit,  Pource  que  tu  es  sorti  le  premier  du