44:76  et  fracta,  non  posse  tamen  hoc  obstare  Deo,  quominus  eam  restituat.  Nam  per  expulsam  et  claudicantem  nihil  aliud  intelligit  quam  omni  virtute  ita  exutam,  ut  deficiat  in  se.  Comparat  igitur  ecclesiam  Dei  homini  propter  membra  luxata  quasi  mortuo.  Ubi  ergo  inutiles  sumus  ad  omne  opus,  vita  nostra  quid  aliud  est  quam  languor  similis  morti?  Atqui  propheta  hic  affirmat  opportunum  hoc  fore  tempus,  quo  Deus  subveniat  suis,  ubi  videbit  ita  prostratos  et  iacentes,  ubi  erunt  dispersi  huc  et  illuc,  quemadmodum  si  corpus  hominis  laceratum  sit,  et  proiectum  brachium  huc,  illuc  vero  crus,  ita  ut  nihil  cohaereat:  pronuntiat  tamen  non  posse  hoc  obstare  Deo,  quominus  colligat  ecclesiam  suam  et  instauret  ut  adhuc  recipiat  plenum  suum  vigorem.  Denique  significat  restitutionem  ecclesiae  fore  quandam  formam  resurrectionis,  quia  Dominus  humiliabit  populum  suum,  donec  fere  sit  exanimis,  ut  iam  respirare  nequeat.  Sed  tandem  colliget  et  sic  colliget  ut  non  modo  respiret,  sed  recuperato  novo  vigore  perinde  floreat  quasi  nunquam  iacturae  quidquam  passus  esset.  Ego  non  possem  hodie  absolvere.  Restabat  heri  ex  penultimo  versu  prophetae  Sophoniae  posterius  membrum,  ubi  promittit  Deus  fore  nobiles  Iudaeos,  qui  prius  non  modo  fuerant  obscuri,  sed  etiam  expositi  omnibus  probris.  Nam  Dare  in  nomen  et  laudem  nihil  aliud  est  quam  celebres  ipsos  reddere,  ut  volitent  per  ora  hominum,  quemadmodum  loquuntur.  Dicit  autem,  In  terra  pudoris,  vel  opprobrii  ipsorum:  quia  ubique  derisi  fuerant,  quum  increduli  putarent  ipsos  fuisse  vana  spe  delusos.  Nempe  quia  Deum  sub  cuius  fide  agebant,  custodem  sibi  fore  perpetuum  iactantes,  nihilominus  abstracti  fuerant  in  exsilium.  Hinc  igitur  ridendi  et  subsannandi  materia:  sed  promittitur  hic  mutatio  in  melius  :  quia  in  Assyria  et  Chaldaea  videbunt  omnes  populum  hunc  fuisse  divinitus  electum,  ut  esset  singulari  testimonio  inter  omnes  gentes:  quicunque  in  Deum  recumbunt,  eos  minime  falli:  quia  reperiunt  eum  fidelem  in  suis  promissis.  Sequitur  postremus  versus.  20.  In  tempore  Ulo  reducam  vos,  in  tempore  colligam  vos:  quia  ponam  vos  in  nomen  et  laudem  per  cunctos  populos  terrae  (inter  cunctos  populos  terrae)  quum  reducam  captivitates  vestras  in  oculis  vestris,  dicit  Iehova.  Eandem  sententiam  verbis  paulum  mutatis  repetit,  neque  id  sine  causa:  quoniam  nemo  tunc  putasset  Iudaeos,  qui  velut  in  sepulcrum  proiecti  fuerant,  posse  unquam  illinc  emergere:  praesertim  vero  posse  attolli  in  tantam  dignitatem  et  tam  sublimem