40:76  lamentationum.  Nunc  ergo  intelligimus  magis  ac  magis  exasperatos  fuisse  Israelitas,  quum  propheta  diceret  se  non  venisse  nisi  instar  fecialis,  qui  bellum  denuntiaret  nomine  Dei:  et  interea  nulla  haberet  pacis  mandata.  Quantum  ad  reliquum  populum,  videbimus  quidem  postea  multis  locis  fuisse  praeconem  misericordiae  Dei:  sed  oportuit  expergefieri  hoc  modo  Iudaeos,  ut  sentirent  Deum  sibi  esse  adversum:  et  prophetam  non  alio  fine  sibi  fuisse  missum,  nisi  ut  quasi  armatus  in  medium  prodiret,  et  fulminaret  Dei  ipsius  nomine.  Non  possem  nunc  ulterius  prosequi,  et  tamen  quod  sequitur  cohaeret.  CAPUT  III.  1.  Et  dixit  mihi,  Fili  hominis,  quod  inveneris  comedendo  comede,  volumen  hoc,  et  vade,  loquere  ad  domum  Israel.  2.  Et  aperui  os  meum,  et  pavit  me  volumine  isto.  Quum  iubet  eum  comedere  quidquid  nactus  erit,  non  debet  hoc  extendi  ad  res  quaslibet  quae  occurrent:  sed  qualiscunque  sit  gustus  libri,  vetatur  propheta  eum  refugere.  Potuit  enim  acerbitas  vel  amaritudo  efficere,  ut  minas  Dei  respueret.  Denique  tantum  notatur  libri  qualitas,  quia  non  nisi  tristem  materiam  continebat.  Subiicit  se  os  aperuisse  parendi  causa:  quo  significat  non  fuisse  curiosum  vel  lautum  in  sapore  quaerendo,  sed  omissa  disceptatione,  se  sumpsisse  quod  divinitus  oblatum  erat.  Iam  addit,  3.  Et  dixit  mihi,  Fili  hominis,  ventrem  tuum  pasce,  et  viscera  tua  reple  (replebis)  volumine  isto,  quod  ego  do  tibi:  et  comedi,  et  fuit  in  ore  meo  tanquam  mel  in  dulcedine.  Prosequitur  Ezechiel  quod  ante  vidimus,  nempe  datum  sibi  fuisse  volumen  quod  comederet:  quia  servi  Dei  debent  loqui  ex  intimo  affectu  cordis.  Scimus  multos  habere  linguam  satis  volubilem,  sed  nihil  aliud  quam  sese  ostentant.  Interea  Deus  etiam  habet  ludibrio  eorum  vanitatem,  quia  labor  eorum  caret  fructu.  Et  ideo  notandum  est  illud  Pauli  quod  citavi,  regnum  Dei  esse  in  virtute.  Efficacia  autem  spiritus  sancti  sese  non  exserit,  nisi  ubi  qui  vocatus  est  ad  docendum,  studium  suum  ad  exsequendum  munus  serio  applicat.  Hac  igitur  ratione  iussus  est  Ezechiel  comedere  volumen.  Iam  dicit  sibi  fuisse  dulce  instar  mellis.  Atqui  paulo  ante  retulit  fuisse  refertum  maledictionibus.  Ergo  aut  exuerat  omnem  humanitatem,  aut  debuit  tangi  moe-