13:76  honnestete  de  vie.  Mais  les  grandz  desbauchemens  et  enormes  que  ie  voy  par  le  monde,  me  contraignent  de  vous  prier  a  prendre  aussi  ceste  sollicitude  que  les  hommes  soient  tenuz  en  bonne  et  honneste  discipline.  Sur  tout  que  lhonneur  de  Dieu  vous  soit  recommande,  pour  punir  les  crimes  dont  les  hommes  nont  point  accoustume  de  faire  grand  cas.  Ie  le  dy  pource  que  quelquefois  les  larrecins,  batteries  et  extorsions  seront  asprement  punies,  pource  que  les  hommes  y  sont  offensez.  Ce  pendant  on  souffrira  les  paillardises  et  adulteres,  les  yvrogneries,  les  blasphemes  du  nom  de  Dieu,  quasi  comme  choses  licites  ou  bien  de  petite  importance.  Or  nous  oyons  au  contraire  en  quelle  estime  Dieu  les  a.  Il  nous  declaire  combien  son  nom  luy  est  precieux.  Ce  pendant  il  est  comme  deschire  par  pieces  et  foulle  aux  piedz.  Il  ne  se  peult  doncques  faire  quil  laisse  telz  opprobres  impuniz.  Qui  plus  est  lescripture  nous  monstre  que  par  les  blasphemes  tout  ung  pais  est  infecte.  Quant  aux  adulteres  ce  nous  doict  estre  une  grand  honte  a  nous  qui  nous  reclamons  Chrestiens,  que  les  payens  y  ayent  tenu  plus  grande  rigueur  a  les  punir  que  nous:  et  mesme  quelques  fois  quon  ne  fait  que  sen  rire.  Quand  le  sainct  mariage,  qui  doibt  estre  une  image  vive  de  lunion  sacree  que  nous  avons  avec  le  filz  de  Dieu,  est  pollue,  que  laliance  qui  doibt  estre  la  plus  ferme  et  indissoluble  de  ce  monde,  est  desloyaument  rompue,  si  nous  ne  prenons  point  cela  a  coeur,  cest  signe  que  nous  navons  gueres  de  zelle  de  Dieu.  Touchant  la  paillardise,  ii  nous  doibt  bien  suffire  que  S.  Paul  la  compare  a  sacrilege,  dautant  que  par  icelle  les  temples  de  Dieu,  qui  sont  noz  corps,  sont  prophanez.  Item  que  les  paillardz  et  yvrognes  sont  banniz  du  royaume  de  Dieu,  tellement  quil  nous  est  deffendu  de  converser  avec  eulx:  dont  il  sensuit  bien  quilz  ne  doibvent  point  estre  endurez  en  lEglise.  Et  voyla  qui  est  cause  de  tant  de  fleaux  qui  sont  auiourdhuy  sur  la  terre.  Car  dautant  que  les  hommes  se  pardonnent  telles  enormi  tez,  il  fault  que  Dieu  en  face  la  vengeance.  Parquoy  afin  de  prevenir  son  ire,  ie  vous  prie,  Monseigneur,  dy  tenir  la  bride  royde,  et  faire  que  ceulx  qui  oyent  la  doctrine  de  lEvangile,  sapprouvent  estre  Chrestiens  par  sainctete  de  vie.  Car  comme  la  doctrine  est  lame  de  lEglise  pour  la  vivifier,  aussi  la  dis-  /  cipline  et  correction  des  vices  sont  comme  les  nerfz  pour  maintenir  le  corps  en  son  estat  et  vigueur.  Loffice  des  evesques  et  curez  est  de  veiller  sur  cela,  afin  que  la  Cene  de  nostre  Seigneur  ne  soit  point  polluee  par  gens  de  vie  scandaleuse:  Mais  en  lauthorite  ou  Dieu  vous  a  mis,  la  principalle  charge  revient  sur  vous,  voyre  de  mettre  les  aultres  en  train,  afin  que  chacun  sacquitte  de  son  debvoir,  et  faire  que  lordre  qui  aura  este  estably  soit  deuement  observe.