23:758  nous  avons  touche)  qu'Abraham  ne  pouvoit  rien  esperer  de  Dieu  sinon  par  le  moyen  d'Isaac:  car  il  est  dit  qu'en  Iesus  Christ  toutes  les  promesses  de  salut  ont  leur  fermete,  et  qu'elles  sont  ratifiees  pour  estre  Ouy  et  Amen  :  Nostre  Seigneur  Iesus  Christ  devoit  venir  de  la  race  d'Isaac:  et  c'estoit  vrayement  la  semence  qui  luy  avoit  este  promise.  Comment  donc  Abraham  pouvoit-il  accorder  cela  qu'Isaac  son  fils  mourust,  et  cependant  que  les  promesses  de  Dieu  demourassent  en  leur  vigueur  et  en  leur  execution?  Or  tant  y  a  que  l'Apostre  dit  qu'Abraham  a  immole  son  fils  par  foy.  Et  ainsi  il  nous  signifie  qu'Abraham  quoy  qu'il  en  soit,  s'est  tenu  et  arreste  a  ce  que  Dieu  luy  avoit  prononce  de  sa  bouche:  et  quant  a  ce  discord  qu'il  [pag.  252]  pouvoit  trouver  entre  ce  commandement  qui  luy  estoit  fait  et  les  promesses  qui  luy  avoyent  este  donnees,  voici  l'Apostre  respond:  Qu'il  a  creu  que  Dieu  estoit  assez  puissant  pour  susciter  des  cendres  d'Isaac  quand  le  corps  seroit  tout  brule,  qu'il  luy  pouvoit  susciter  ceste  semence  qui  luy  avoit  este  promise.  Or  c'est  un  article  qui  nous  sera  profitable,  moyennant  que  nous  le  comprenions  bien:  car  nous  sommes  admonnestez  par  cela  de  croire  tellement  en  Dieu  que  nous  surmontions  le  monde,  et  tout  ce  que  nous  pouvons  appercevoir,  et  ce  que  nous  comprenons  en  nostre  raison  et  intelligence.  Car  si  la  foy  s'appuyoit  sur  ce  que  nous  pouvons  comtempler,  que  seroit-ce?  La  vertu  de  Dieu  seroit  par  trop  amoindrie.  Et  d'avantage,  il  nous  faut  noter  ce  qui  est  dit  par  l'apostre,  que  la  foy  est  une  vision  des  choses  invisibles,  et  une  approbation  des  choses  absentes.  Ce  qui  respond  a  ce  que  dit  sainct  Paul  au  huitieme  chapitre  des  Romains:  c'est  que  nous  n'esperons  pas  les  choses  qui  nous  sont  patentes  et  notoires,  mais  celles  qui  sont  eslongnees  de  nous,  celles  qui  semblent  mesmes  estre  impossibles.  Puis  qu'ainsi  est  que  les  promesses  de  Dieu  ne  nous  apportent  pas  a  veue  d'oeil  ce  qu'elles  contienent,  il  faut  (comme  i'ay  desia  dit)  que  nous  montions  par  dessus  le  monde  quand  il  est  question  de  [pag.  253]  croire.  Et  qu'est-ce  que  cela?  Assavoir,  que  nous  ne  mesurions  pas  la  vertu  de  Dieu  qui  est  infinie,  a  ces  moyens  qui  se  presentent  et  lesquels  nous  comprenons.  Mais  quand  ces  pensees  nous  viendront  en  fantasie,  que  la  chose  ne  se  peut  faire,  qu'il  y  a  comme  du  contredit,  que  nous  concluyons:  Si  est-ce  que  Dieu  accomplira  ce  qu'il  a  dit.  Et  comment?  o  ce  n'est  pas  a  nous  d'en  iuger.  Ici  il  nous  faut  captiver  tous  nos  sens,  et  faire  cest  honneur  a  Dieu  qu'il  est  fidele:  mais  que  nous  ne  savons  pas  quelles  issues  il  trouvera  la,  ou  il  nous  semble  que  tout  est  ferme  et  bousche.  Voila  donc  ce  que  nous  avons  a  retenir  de  ce  qui  nous  est  enseigne  par  l'Apostre.  Or  si  Abraham  eust  argue  par  raison  humaine,  il  eust  dit:  Dieu  n'est  point  48*