23:754  fragilite  quand  il  ne  nous  admene  pas  a  un  tel  examen  et  si  rude,  comme  est  celuy  duquel  Moyse  fait  ici  mention.  Suyvant  cela  donc,  soyons  advertis  que  si  Dieu  nous  espreuve  nous  ayons  le  col  plie,  et  que  nous  souffrions  d'estre  esprouvez  de  luy.  Et  aussi  c'est  le  principal  de  toute  nostre  vie,  que  de  nous  captiver  en  telle  sorte  que  Dieu  dispose  de  nous  a  son  plaisir:  et  que  nous  ne  venions  point  nous  rebequer,  pour  dire  qu'il  nous  traitte  en  telle  sorte,  et  en  telle.  C'est,  di-ie,  le  principal  de  nostre  vie.  Vray  est  que  ce  sera  beaucoup  quand  nous  pourrons  cheminer  en  integrite  avec  nos  prochains,  que  nous  ne  ferons  tort  a  nul,  que  nous  serons  chastes  et  pudiques,  que  nous  serons  sobres  en  nostre  vie,  que  nous  fuirons  toute  yvrongnerie  et  intemperance,  qu'il  ne  sortira  nuls  blasphemes  de  nostre  bouche,  et  choses  semblables.  Et  bien,  voila  de  grandes  vertus,  et  qu'on  ne  rencontre  pas  tousiours  [pag.  243]:  mais  ce  n'est  pas  le  principal.  Car  le  principal  est,  comme  i'ay  desia  dit:  Qu'en  servant  a  Dieu,  si  nous  sommes  assaillis  de  beaucoup  de  fascheries,  que  le  diable  nous  dresse  des  alarmes,  qu'il  nous  tende  des  embusches,  que  les  hommes  soyent  si  malins  et  pervers,  que  l'un  nous  pieque,  l'autre  nous  frape,  que  l'autre  tasche  a  nous  ruyner:  et  d'autre  part  que  nous  trainions  les  ailes,  que  nous  ayons  faim  et  soif,  que  nous  soyons  blasmez  et  mesprisez:  quand  tout  cela  sera,  si  nous  faut-il  encores  benir  le  nom  de  Dieu,  et  que  toutes  nos  angoisses  et  nos  passions  soyent  adoucies,  et  que  nous  puissions  tousiours  dire,  Seigneur,  que  ta  volonte  soit  faite,  et  que  tu  nous  traittes  selon  que  tu  voudras:  et  quand  ce  seroit  beaucoup  pis,  neantmoins  nous  sommes  tout  prests  a  recevoir  le  tout.  Quand  donc  nous  serons  ainsi  patiens,  il  est  certain  que  voila  le  principal,  ou  il  nous  faut  tendre.  Et  sur  tout  ceste  histoire  doit  tant  plus  estre  prisee  de  nous,  et  meditee,  veu  que  nostre  Seigneur  nous  a  voulu  declairer  ce  que  nous  avons  a  comprendre  en  la  personne  de  nostre  pere  Abraham,  a  fin  d'ensuyvre  son  exemple.  Et  comme  i'ay  desia  dit,  quand  Dieu  nous  admeneroit  la,  que  nous  et  tout  ce  qu'il  nous  a  mis  en  main  luy  soit  dedie.  Car  si  Abraham  n'eust  eu  ce  principe,  il  est  certain  que  iamais  n'eust  marche  [pag.  244]  un  pas,  et  mesmes  il  fust  bien  recule  au  lieu  de  s'approcher  de  Dieu:  mais  il  avoit  ce  principal,  qu'il  n'estoit  pas  a  soy,  et  que  ce  que  Dieu  luy  avoit  donne,  il  n'en  devoit  pas  user  a  sa  poste  pour  le  retenir:  mais  il  faisoit  son  conte:  Me  voici,  comme  aussi  il  le  monstre.  Car  quand  Dieu  l'appelle,  Abraham:  Me  voici,  Seigneur:  ceste  responce-la  declaire  qu'Abraham  estoit  la  comme  attentif  pour  recevoir  les  commandemens  que  Dieu  luy  donneroit,  tout  ainsi  qu'un  serviteur  sera  vigilant.  Car  si  son  maistre  marche  il  sera  la  a  ses  talons,  pour  dire  :  Vous  plait-il  quel-  48