23:747  747  SERMONS.  748  c'est  qu'Abraham  a  este  contraint  de  tuer  son  fils  voire  son  propre  fils  unique.  Or  ceci  outrepasse  tout  ce  qui  seroit  possible  d'imaginer  d'obeissance,  qu'un  homme  fidele  seroit  prest  de  rendre  a  Dieu,  nous  devons  estre  siens  et  a  vivre,  et  a  mourir:  mais  ce  qui  est  ici  commande  a  Abraham,  est  beaucoup  plus.  Car  il  n'est  pas  question  seulement  qu'Abraham  se  renge  du  tout  a  [pag.  228]  Dieu,  renoncant  a  soy-mesme,  ct  que  le  fils  qui  luy  a  este  donne  luy  soit  oste,  et  qu'il  le  quitte,  comme  quand  il  plairoit  a  Dieu  de  le  retirer  qu'il  portast  cela  patiemment:  il  n'est  pas  question  de  cela,  mais  il  faut  que  luy  mesme  le  tue.  Voila  une  chose  si  dure  et  si  estrange  que  nous  n'en  pouvons  pas  ouir  parler,  que  nous  n'en  soyons  comme  esperdus.  Ce  n'est  point  donc  sans  cause,  que  Moyse  depuis  le  chapitre  neufieme,  apres  qu'il  a  raconte  ci  dessus  de  la  vie  d'Abraham,  met  cest  acte  en  avant,  et  dit  qu'apres  ces  choses  Dieu  l'a  encores  tente.  Or  il  avoit  eu  une  tentation  bien  grande,  quand  Dieu  l'arracha  de  la  maison  de  son  pere:  et  mesmes  les  mots  remportent,  quand  il  dit:  Sors  de  la  maison  de  ton  pere:  et  de  tout  ton  parentage,  et  du  lieu  de  ta  naissance,  et  puis,  ou  est-ce  qu'il  trouvera  meilleure  habitation?  Vien,  dit-il,  en  un  pays  incognu,  comme  un  povre  aveugle  qui  a  les  yeux  fermez.  Voila  le  pays  ou  ie  te  veux  mener,  voire  mais  il  ne  luy  est  pas  cognu:  il  faut  donc  qu'il  soit  la  comme  iettant  la  plume  au  vent,  ne  sachant  de  quel  coste  se  tourner.  Voila,  di-ie,  une  grieve  tentation  a  Abraham,  quand  il  faut  qu'il  suyve  la  ou  Dieu  l'appelle,  ne  sachant  toutesfois  ou  il  va,  et  neantmoins  c'est  comme  son  Abc.  Car  voila  par  ou  Dieu  commence  quand  il  veut  enseigner  en  son  escole.  Mais  est-il  entre  [pag.  229]  en  la  terre?  nous  voyons  comme  la  famine  l'en  chasse,  et  comme  la  femme  luy  est  ravie.  Et  pour  la  seconde  fois  mesmes,  nous  voyons  qu'il  est  tormente  ca  et  la,  qu'il  n'a  point  de  repos:  il  n'y  a  celuy  qui  ne  se  dresse  contre  luy,  et  luy  endure  toutes  ces  choses.  Et  cependant  il  ne  murmure  point  contre  Dieu,  il  ne  se  decourage  point  pour  tous  les  troubles  qui  luy  sont  dressez,  ni  pour  nulles  afflictions  qu'il  endure:  comme  ceux  qui  sont  tant  delicats,  que  si  Dieu  ne  les  traitte  a  leur  guise  ils  plaquent  la  tout,  et  ne  veulent  plus  savoir  que  c'est  de  luy  obeir.  Or  combien  qu'Abraham  fust  ainsi  traitte  rudement,  si  ne  laisse-il  pas  de  continuer  en  un  mesme  train:  mais  apres  toutes  ces  choses,  et  combien  est-ce  qu'il  endure?  Ce  n'est  point  seulement  pour  trois  ou  quatre  ans,  mais  il  est  tellement  agite,  que  quand  il  a  passe  vingt  et  trente  et  quarante  ans  en  ceste  terre,  c'est  tousiours  a  recommencer  et  pis  que  devant,  iusques  a  ce  qu'il  est  contraint  mesmes  de  quitter  l'amour  de  son  fils  aisne  et  de  s'en  despouiller,  qui  estoit  desia  comme  une  espece  de  mort.