54:74  vif:  et  c'est  afin  que  tu  ayes  tant  plus  de  soin  de  cela,  et  notes  que  toutes  les  graces  que  Dieu  t'a  commises,  comme  de  ce  que  tu  es  ordonne  ministre  de  sa  parole,  Pasteur  de  son  Eglise,  que  tu  as  les  dons  qui  sont  requis  pour  t'acquitter  de  ton  devoir,  que  tout  cela  est  un  depost  excellent:  il  le  faut  doncques  garder.  Or  sous  ce  mot  de  Depost,  sainct  Paul  signifie  que  ceux  qui  ont  receu  quelque  grace  sont  d'autant  plus  obligez  a  Dieu,  et  chargez.  Comme  si  un  homme  avoit  donne  en  garde  a  son  ami  tout  son  bien,  qu'il  luy  eust  baille  la  clef  de  son  coffre  ou  fust  son  thresor,  qu'il  luy  eust  mis  tous  ses  instrumens  entre^mains,  voila  un  depost.  Ainsi  Dieu  nous  commet  ce  qu'il  a,  et  ce  qui  appartient  a  luy  seul:  il  nous  le  commet:  non  point  que  nous  en  soyons  proprietaires.  Il  est  vray  que  les  graces  que  nous  avons  receues  de  Dieu,  sont  nostres,  et  les  pouvons  ainsi  appeller:  mais  ce  n'est  pas  qu'il  nous  ait  quitte  son  droict,  qu'il  n'en  doive  tousiours  estre  glorifie,  et  que  le  tout  ne  se  doive  rapporter  a  luy.  Nous  voyons  doncques  que  sainct  Paul  admoneste  ici  ceux  qui  ont  receu  les  graces,  qui  ont  quelque  charge  et  commission,  qu'il  faudra  qu'ils  en  rendent  conte  a  Dieu.  Qu'ils  ne  pensent  point  doncques  les  appliquer  a  tel  usage  que  bon  leur  semblera,  sinon  qu'ils  les  facent  servir  a  leurs  prochains,  que  Dieu  en  soit  honore,  et  que  Iesus  Christ  ait  tousiours  sa  preeminence.  Que  s'ils  ne  tendent  la,  ils  sont  sacrileges,  et  faudra  que  Dieu  plaide  contr'eux.  Car  si  un  homme  avoit  fraude  son  ami  quand  il  luy  aura  baille  son  bien  entre  mains,  se  fiant  en  sa  foy,  que  celuy-la  soit  un  larron,  qu'il  retiene  le  depost,  ou  bien  qu'il  ait  dissipe  ce  qui  luy  estoit  commis  entre  mains,  ne  faudra-il  point  que  nous  soyons  coulpables  devant  Dieu  quand  nous  aurons  abuse  de  ses  graces?  Voila  pour  un  item.  Mais  pource  qu'on  ne  tient  pas  si  grand  conte  d'un  depost  commun  comme  des  choses  qui  sont  precieuses,  notamment  sainct  Paul  parle  de  ce  depost  qui  est  plus  a  estimer  et  priser  que  toutes  les  choses  du  monde.  Si  on  baille  en  garde  un  pot  ou  un  plat,  ou  ie  ne  scay  quoy,  et  bien,  voila  un  depost  :  mais  on  le  mettra  la,  et  ne  s'en  souciera-on  gueres.  Si  on  baille  quelques  ioyaux  qui  soyent  de  grand  prix,  alors  on  les  serre,  on  cognoist  bien,  Voici  qui  est  d'importance.  Ou  bien  si  on  regarde,  Voici  tous  les  documens  d'une  maison:  comment?  un  homme  seroit  ruine  s'il  avoit  perdu  ceci.  Nous  sommes  donc  plus  songneux  de  garder  les  deposts  qui  sont  de  prix.  Sainct  Paul  suivant  cela  dit  que  ceux  qui  ont  receu  les  graces  du  S.  Esprit,  n'ont  pas  seulement  un  depost  vulgaire,  mais  que  Dieu  leur  a  commis  un  thresor  inestimable,  et  qu'il  faut  bien  qu'ils  avisent  de  le  garder.  En  quelle  sorte?  Ce  ne  sera  point  en  le  supprimant,  nenni:  mais  la  facon  de  garder  ce  thresor  qui  nous  est  commis,