39:74  fuisset  misera  ecclesiae  dissipatio  sine  capite,  et  sine  mediatore.  Interea  non  dubium  est,  quin  alludat  Ieremias  ad  locum  Mosis  quem  citavimus:  et  ita  rursus  castigat  populi  incredulitatem,  quia  non  poterant  dubitare  de  ecclesiae  restitutione,  quin  Deum  arguerent  mendacii,  ac  si  verba  dedisset  Abrahae,  quum  diceret,  Numera  stellas  coeli  si  potes,  et  arenas  maris,  sic  erit  semen  tuum.  Ostendit  igitur  Deum  fore  veracem  in  illa  promissione,  ut  scilicet  multiplicet  ecclesiam  suam  instar  stellarum  coeli  et  arenae  maris.  Sequitur,  23.  Et  fuit  sermo  Iehovae  ad  Ieremiam,  dicendo,  24.  Annon  vidisti  quomodo  populus  hic  loquantur?  dicendo,  Duas  familias  quas  elegit  Iehovah  in  ipsis,  reprobavit  eas  (sed  abundat  particula  uro,  deinde  copula  etiam  supervacua  est,  nisi  vertatur  in  adverbium  temporis  nunc:  nunc  ergo  abiecit  eas)  et  populum  meum  spreverunt,  ut  non  sit  amplius  gens  in  conspectu  ipsorum  (hoc  est,  ipsorum  iudicio).  Causam  nunc  assignat  cur  tam  prolixe  disseruerit  de  liberatione  populi,  et  perpetua  conservatione,  quoniam  scilicet  vix  apud  incredulos  poterat  locum  habere  Dei  benedictio.  Porro  non  tantum  admonet  prophetam  suum  Deus  cur  ipsum  toties  iterare  rem  unam  iubeat,  sed  loquitur  etiam  ipsius  populi  respectu,  ut  sciant  repetitionem  hanc  non  esse  supervacuam,  quia  necesse  erat  luctari  cum  obstinata  eorum  pravitate.  Sic  enim  occupaverant  suos  animos  et  sensus  desperatione,  ut  reiicerent  omnes  Dei  promissiones,  nec  locum  darent  fiduciae  aut  spei.  Sunt  quidam  qui  hoc  exponant  de  Chaldaeis,  apud  quos  contemptibilis  erat  populus:  sed  frigida  est  illa  interpretatio.  Mihi  igitur  dubium  non  est,  quin  hic  Deus  cum  Israelitis  expostulet,  quod  scilicet  sibi  ipsi  spem  liberationis  eriperent.  Neque  enim  sic  loquutus  esset  Ieremias  de  Chaldaeis  ,  annon  vidisti  populum  hunc  ?  Compellat  Ieremiam,  quia  non  migraverat  ex  urbe.  Ergo  ostendit,  quemadmodum  nuper  attigi,  necessariam  esse  causam,  cur  toties  confirmet  quod  satis  aperte  semel  dictum  fuerat  de  populi  reditu.  Annon  vidisti,  inquit,  quomodo  populus  iste  loquatur,  dicendo,  Iehovah  nunc  repudiat  duas  familias  quas  elegerat,  nempe  regnum  Israel  et  regnum  Iehudah.  Hoc  quidem  erat  accidentale,  quod  populus  divisus  fuerat  in  duas  partes.  Oportuit  enim  unam  esse  gentem.  Sed  tametsi  defectione  decem  tribuum  contigerat  ut  corpus  populi  distractum  esset.  Propheta  ex  recepto  iam  usu  dicit  duas  familias  esse  electas.  Electio  quidem  Dei  erat  alia,  nempe  ut  unicum  esset  Abrahae  semen.  Quemadmodum  enim  unum  est  caput,  ita  etiam  unum  corpus  esse  oportet.  Sed  Deus  non  abiecerat  prorsus  decem  tribus,