35:74  preschee,  qu'ils  lisent  l'Escriture  saincte:  mais  il  leur  donne  ces  remords  que  nous  avons  dit:  car  il  n'y  a  celuy  qui  ne  porte  tesmoignage  en  sa  conscience,  comme  sainct  Paul  le  monstre  au  2.  chap.  des  Rom.  et  nous  l'experimentons  assez  de  nature.  Ainsi  donc  Dieu  revele  sa  volonte  aux  hommes,  entant  qu'il  est  besoin  pour  les  rendre  inexcusables:  et  cependant  pource  qu'il  voit  que  les  hommes  ne  souffrent  point  d'estre  enseignez  de  luy,  et  qu'ils  bouchent  leurs  aureilles,  ou  bien  qu'ils  tiennent  sa  doctrine  comme  frivole,  que  des  advertissemens  qu'on  leur  fait  ils  n'en  font  que  se  mocquer:  d'autant  donc  que  les  hommes  s'oublient  ainsi,  il  faut  que  Dieu  seelle  sa  doctrine,  et  la  rende  authentique:  tellement  que  quand  les  hommes  sont  affligez,  ils  cognoissent,  Et  bien,  voici  Dieu  lequel  me  monstre  sa  vertu:  et  pource  que  ie  ne  l'ay  point  adore,  et  que  sa  maieste  ne  m'a  pas  este  en  telle  reverence  comme  il  appartenoit,  maintenant  il  faut  que  par  force  ie  le  cognoisse,  et  que  ie  pense  mieux  aux  instructions  qu'il  m'avoit  donnees.  Car  qui  est  cause  que  i'ay  este  afflige,  et  que  le  mal  m'est  venu  assaillir  sans  que  i'y  pensasse?  Pource  que  ie  me  faisoye  a  croire,  que  ie  pourroye  eschapper  de  la  main  de  Dieu.  Or  maintenant  il  me  tient  enserre:  voila  donc  comme  sa  doctrine  m'est  autorisee,  c'est  a  dire  qu'elle  m'est  readue  telle,  qu'il  faut  en  despit  de  mes  dens  que  i'y  pense,  et  que  ie  l'honnore  mieux  que  ie  n'ay  pas  fait.  Et  ainsi  apprenons  toutes  fois  et  quantes  que  Dieu  nous  afflige,  qu'il  nous  envoye  quelques  chastimens:  cognoissons,  di-ie,  que  ce  sont  des  seaux  qu'il  imprime  aux  admonitions  qu'il  nous  avoit  donnees  auparavant.  Si  une  lettre  n'est  pas  seellee,  on  en  fera  doute:  si  on  la  produit,  elle  n'aura  point  de  foy,  pource  qu'elle  n'est  point  authentique.  Mais  si  le  seau  y  est  appose,  la  lettre  est  indubitable,  voila  un  instrument  solennel,  il  le  faut  recevoir.  Notons  donc  que  Dieu  en  besongne  ainsi  en  nous  affligeant,  il  seelle  la  doctrine.  Car  si  l'Evangile  n'estoit  point  presche  entre  nous,  que  nous  n'eussions  mesmes  ne  loy,  ne  rien  qui  soit,  qu'il  n'y  eust  que  nostre  conscience,  ainsi  qu'ont  les  Payens  et  les  Turcs:  si  est-ce  que  desia  nous  serions  assez  advertis  de  la  volonte  de  Dieu,  et  en  aurions  assez  de  cognoissance,  sinon  que  nous  la  vinssions  estouffer  par  nostre  malice.  Or  puis  qu'ainsi  est  qu'il  parle  a  nous  si  privement  et  en  sa  Loy  et  en  ses  Prophetes,  et  sur  tout  qu'il  a  parle  par  la  bouche  de  Iesus  Christ:  si  on  voit  que  de  nostre  coste  nous  soyons  si  durs  et  si  revesches,  que  nous  ne  vueillions  rien  comprendre:  faut-il  s'esbahir  si  nostre  Seigneur  frappe  a  grans  coups,  et  qu'il  nous  solicite  de  venir  a  luy?  Et  ainsi  maintenant  que  nous  ne  soyons  point  par  trop  troublez  des  afflictions:  comme  il  y