28:74  nous  le  verrons  au  trente  deuxiesme  chapitre  de  ce  livre.  Or  nous  sommes-nous  tenus  la  courts,  n'avons-  nous  point  appette  vengeance  contre  ceux  qui  nous  ont  irrite,  et  qui  nous  ont  fait  quelque  outrage?  la  dessus  attendons  que  nostre  Seigneur  y  provoye,  ouy  ayans  pitie  mesmes  de  nos  ennemis,  et  taschans  de  les  ramener  au  chemin  de  salut  s'il  est  possible.  Cependant  advisons  aussi,  Dieu  faitil  vengeance  des  meschans?  Que  nous  cognoissions  sa  bonte  envers  nous,  et  que  cela  nous  soit  un  tesmoignage  qu'il  nous  regarde  de  pres,  et  qu'il  veille  cependant  que  nous  dormons.  Que  donc  nous  apprenions  de  faire  nostre  profit  de  tous  les  chastimens  que  Dieu  fera  des  ennemis  de  son  Eglise,  cognoissant  que  par  cela  il  nous  declaire  comme  il  nous  aime  d'une  affection  paternelle,  et  qu'il  pense  de  nous  et  de  nostre  salut  cependant  que  nous  ne  le  cuidons  point.  Voila  qui  doit  resiouir  les  fidelles,  et  les  confermer  a  se  fier  tant  mieux  en  Dieu,  et  a  recourir  a  luy  toutes  fois  et  quantes  qu'ils  sont  troublez  par  les  meschans,  ou  qu'on  tasche  de  les  divertir  du  chemin  de  leur  salut.  Mais  quant  a  ceux  qui  sont  commis  pour  faire  la  vengeance  de  Dieu,  qu'ils  la  facent  constamment,  et  toutesfois  sans  malice,  sans  amertume.  Car  si  nous  meslons  nos  affections  parmi  ce  que  Dieu  nous  commande,  desia  la  vengeance  ne  sera  plus  de  luy,  elle  sera  de  nostre  chair  :  c'est  a  dire,  de  nos  passions  desreiglees.  Que  donc  ceux  qui  ont  la  charge  de  iustice,  advisent  bien  d'y  proceder  en  equite  et  droicture,  sans  qu'ils  soyent  transportez  en  nulle  facon  de  quelque  mauvais  appettit.  Et  au  reste,  soyons  separez  en  general  des  meschans,  et  ne  nous  accouplons  point  avec  eux,  voire  quand  ils  se  separent  de  l'Eglise  de  Dieu.  Car  si  nous  avons  accointance  avec  eux,  n'est-ce  pas  entant  qu'en  nous  est  faire  conspiration  et  contre  Dieu  et  contre  son  peuple?  Ne  serons-nous  point  complices  par  ce  moyen-la?  Et  ainsi,  il  nous  faut  oublier  en  cest  endroict  tout  parentage.  Il  ne  faut  point  dire:  Celuy-la  est  mon  ami,  celuy-la  est  mon  compere,  ie  l'ay  hante  long  temps.  Il  faut  mettre  bas  toutes  ces  choses-la,  et  dire:  Celuy-la  s'est  declaire  ennemi  de  Dieu,  quand  il  a  empesche  que  les  fidelles  n'eussent  concorde  comme  il  appartient,  quand  il  a  mis  un  scandale,  pour  fermer  la  porte  a  ce  que  l'Eglise  ne  se  multipliast.  Quand  nous  voyons  telles  choses,  que  nous  ne  soyons  plus  menez  de  sottes  affections.  Car  combien  que  les  Iuifs  fussent  parens  des  Moabites,  si  a-il  fallu  neantmoins  qu'ils  les  reiettassent.  Et  pourquoy?  Pource  qu'ils  s'estoyent  alienez  du  peuple  de  Dieu,  et  mesmes  s'estoyent  rendus  ennemis.  Voila  donc  ce  que  nous  avons  a  retenir,  et  ce  que  nous  pratiquons  tresmal.  Car  auiourd'huy  qui  est  celuy  qui  prefere  et  Dieu  et  son  Eglise  a  quel-