26:74  confuses,  qu'on  ne  sache  que  devenir,  que  Dieu  y  prouvoyera.  Que  donc  nous  recourions  a  Dieu  en  cest  endroit,  pour  luy  attribuer  une  vertu  telle,  que  combien  que  nos  sens  deffaillent,  que  nous  luy  remettions  la  chose  en  main,  sachans  qu'il  en  pourra  venir  a  bout.  Voila  donc  ce  que  nous  avons  a  observer.  Et  sans  cela  que  seroit-ce  de  nostre  salut?  Il  est  vray  que  Dieu  par  ci  devant  s'est  monstre  nostre  conducteur,  et  Roy:  et  nous  avons  en  cela  a  tant  mieux  magnifier  sa  grace,  mais  quand  il  est  question  d'esperer  que  Dieu  nous  aidera,  et  que  son  secours  ne  nous  defaudra  point:  il  nous  faut  clorre  les  yeux  a  toutes  difficultez,  et  remettre  toutes  les  choses  en  sa  main,  attendans  qu'il  accomplisse  ses  promesses  puis  qu'il  s'est  gratuitement  oblige  envers  nous,  remettons-luy  tous  les  evenemens  qui  nous  semblent  impossibles.  Et  quand  nous  aurons  cela:  il  est  certain  que  nous  pourrons  estre  asseurez  contre  tous  les  assauts  de  Satan,  et  de  tous  ses  supposts:  combien  qu'ils  machinent  tout  ce  qui  leur  est  possible  pour  nous  ruiner,  si  est-ce  que  nous  ne  serons  point  gens  desconfits  et  esperdus:  mais  que  Dieu  besongnera  en  sorte,  qu'il  ne  nous  faudra  point  craindre  qu'il  n'ameine  nostre  salut  a  sa  perfection  :  combien  qu'il  semble  que  cela  ne  se  puisse  faire,  et  que  nous  n'y  puissions  trouver  d'issue  pour  les  empeschemens  qui  y  sont,  si  est-ce  qu'il  nous  fera  tout  surmonter.  Voila  comme  nous  avons  a  pratiquer  ceste  doctrine.  LE  TROIZIEME  SERMON  SUR  LE  CHAP.  III.  Y.  23-25.  DU  IEUDI  9E  DE  MAY  1555.  Nous  avons  dit  par  ci  devant,  que  Moyse  faisoit  mention  comme  Dieu  l'avoit  prive  de  ce  bien  et  honneur,  qu'il  n'entrast  point  en  la  terre  promise,  pour  le  peche  du  peuple.  Maintenant  il  reitere  ce  propos:  mais  c'est  a  une  autre  fin.  Car  il  falloit  que  le  peuple  fust  adverti  qu'il  n'auroit  pas  tousiours  un  tel  conducteur.  Afin  donc  que  les  exhortations  que  fait  Moyse  soyent  mieux  receues,  que  le  peuple  y  soit  mieux  attentif:  il  leur  declare,  que  luy,  il  leur  defaudra,  et  qu'il  ne  luy  sera  point  permis  de  passer  outre  le  Iordain.  Voila  son  intention,  comme  il  nous  en  faudra  parler  plus  a  plein.  Cependant  voyons  ce  qu'il  dit  ici.  Il  recite  en  premier  lieu,  qu'il  a  prie  le  Seigneur  qu'il  peust  entrer  en  la  terre  promise.  Or  desia  il  avoit  eu  sentence  de  condamnation,  qu'il  n'y  pouvoit  passer.  Il  semble  bien  donc  qu'il  resiste  a  Dieu  entant  qu'en  luy  est,  et  qu'il  ne  peut  recevoir  ce