23:74  exarescere,  quasi  eam  lassaret  pariendi  assiduitas.  Rectius  sentiunt,  qui  crescente  hominum  malitia  residuam  Dei  benedictionem  paulatim  agnoscunt  minui  et  extenuari  :  ac  certe  periculum  est,  nisi  resipiscat  mundus,  ne  bona  pars  hominum  fame  et  ingentibus  aliis  miseriis  brevi  tabescat.  Quod  proxime  sequitur,  Comedes  herbas  agri,  nimis  restricte  (meo  iudicio)  exponunt  qui  existimant  cunctis  fructibus  privatum  fuisse  Adam,  quibus  ante  vesci  permissum  fuerat.  Solum  intelligit  Deus  tantum  prioribus  lautitiis  detractum  iri,  ut  herbas  brutis  solum  animalibus  destinatas  miscere  in  subsidium  cogatur.  Longe  enim  delicatior  erat  victus  initio  appositus  in  beata  illa  et  tam  delectabili  copia,  quam  postea  fuerit:  Partem  igitur  inopiae  exprimit  Deus  sub  nomine  herbarum:  quemadmodum  ei  rex  ex  suis  quempiam  a  primaria  mensa  ad  plebeiam  et  sordidam  ableget*  vel  pater  filium,  a  quo  fuerit  offensus,  pascat  cibario  servorum  pane:  non  quod  illi  interdicat  cibis  aliis  omnibus,  sed  quod  ex  solita  liberalitate  multum  subducat.  Posset  tamen  accipi  hoc  vice  consolationis  additum:  ac  si  dictum  esset:  Quamvis  sentibus  et  spinis  occupata  sit  terra,  quae  nonnisi  bonarum  frugum  mater  esse  debuerat,  simul  tamen  alimenta  tibi  proferet  quibus  vescaris.  19.  In  sudore  vultus  tui.  Alii  quidem  laborem  vertunt,  sed  coacte.  Per  sudorem  vero  intelligitur  labor  durus,  et  fatigationis  taediique  plenus,  qui  sudorem  sua  difficultate  exprimat.  Est  autem  repetitio  superioris  sententiae,  ubi  dictum  fuit:  Comedes  eam  in  labore.  Perperam  huius  loci  praetextu  imperiti  quidam  ad  laborem  manuarium  adigere  omnes  volunt.  Neque  enim  praecipit  hic  Deus  ut  magister  vel  legislator,  sed  tanquam  iudex  poenam  irrogat.  Et  sane  si  hic  praescriberetur  regula,  fieri  omnes  agricolas  necesse  esset,  nec  ullus  daretur  locus  artibus  mechanicis:  extra  mundum  quaerendus  esset  vestitus,  aliaque  vitae  adminicula.  Quid  ergo?  Nempe  Deus  quasi  ex  tribunali  pronunciat  posthac  aerumnosam  fore  hominum  vitam:  quia  Adam  tranquillo  illo,  felici  laetoque  statu,  ad  quem  conditus  fuerat,  indignum  se  praestiterit.  Si  quis  obiiciat  multos  esse  inertes  vel  ignavos,  nihil  id  obstat  quominus  sese  maledictio  ista  in  totum  genus  humanum  diffundat.  Neminem  in  tanta  desidia  torpere  dico,  qui  non  cogatur  experiri  hoc  in  omnes  competere.  Fugitant  quidam  molestias,  plurimi  et  immunitatem,  quoad  in  se  est,  captant:  sed  Dominus  ad  unum  omnes  iugo  impositae  servitutis  premit.  Caeterum  tenendum  simul  est,  non  singulis  ex  aequo  imponi  laborem,  sed  aliis  plus,  aliis  minus.  Ideo  labor  describitur  universo  corpori  communis,  non  proprius  cuique  membro:  nisi  quatenus  Domino  placet  ex  communi  malorum  congerie  singulis  partiri  certam  mensuram.  Interea  notandum  est,  qui  se  placide  subiiciunt  aerumnis,  eos  gratum  Deo  obsequium