11:74  sias  sibi  commissas  deseruissent:  annon  debuit?  Neque  enim  minor  est  perfidia  si  quis  ecclesiam  relinquat,  quam  semel  susceperat  in  suam  fidem,  quam  si  pater  filios  suos  abiiciat.  At  te  comprehendebat  in  eo  numero,  quum  tamen  ab  ea  culpa  esses  alienus.  Si  literas  legeris,  aliud  comperies.  Nihil  enim  postulabat  a  fratribus,  quam  ut  diligenter  inquirerent:  si  cognitio  tuae  causae  te  purgabat,  nonne  id  ipsum  optare  debuisti?  Metim  venisti  deinde:  quanta  intemperies  fuit  apud  Christi  adversarios  iactare,  te  venisse  instructum  ut  nos  haereseos  convinceres?  Et  tamen  retines  interea  illam  gloriam  quod  nihil  contra  evangelium  moliaris.  Sed  quo  exemplo  hoc  nobis  probabis?  Si  quis  ex  professo  bellum  cum  servo  Christi  gerat,  eumque  impediat  quibus  possit  modis,  quominus  Christi  regnum  promoveat,  mirum  si  talem  hominem  dicas  ab  evangelii  partibus  stare.  Vide  iterum  frater  atque  iterum  quo  progrediare.  Ministerium  habemus  a  Christo  minime  disiunctum:  si  dubitas,  habemus  satis  certum  et  fidele  conscientiae  testimonium.  Blandiaris  tibi  ut  voles,  senties  demum  in  impetendo  contra  stimulum  te  calcitrare.  Interea  quid  nobis  nocere  potes?  Haereticos  vocabis.  Ubi?  Nempe  inter  eos  qui  te  pro  haeretico  habebunt,  etiamsi  tua  maledicentia  ad  tempus  abutantur.  Apud  pios  et  doctos  minime  vereor,  ne  quid  mihi  obtrectando  proficias.  Haec  omnia  in  eam  partem  spectant  ac  ita  accipi  abs  te  volo,  ut  coram  Deo  recognoscas,  quam  viam  sis  ingressus,  neque  alios  damnando  immeritos  defensionem  mediteris,  quae  non  modo  omni  fundamento,  sed  etiam  praetextu  careat.  Hoc  si  fuero  consequutus,  satis  mihi  est.  Nolo  tamen  te  propterea  animum  spemque  abiicere.  Nam  si  nobis  vera  et  solida  recti  animi  indicia  ostenderis,  parati  sumus  tecum  mox  in  gratiam  optima  fide  redire,  omnia  oblivisci,  ignoscere,  et  prorsus  ex  memoria  delere.  Utinam  pectus  meum  intueri  posses,  nihil  enim  magis  cupio  quam  Deo  te  reconciliare  primum,  ut  inter  nos  fiat  firma  coniunctio.  Sed  crede  mihi,  nunquam  utiliter  Domino  servies,  nisi  istud  supercilium  deposueris,  et  linguae  amarulentiam.  Ergo  si  in  gratiam  nobiscum  redire  animus  est,  parati  sumus  ad  te  amplexandum:  neque  deerimus  ullis  officiis,  quoad  dabitur  facultas.  Verum  in  illam  quam  a  nobis  exigis  pactionem,  qui  possimus  descendere?  ut  tibi  scilicet  ecclesiam  iam  despondeamus?  Primum  ecclesiae  non  sunt  nobis  ad  manum  sicut  nosti;  deinde  qua  conscientia  id  tibi  pollueremur,  antequam  de  consensione  doctrinae  constet?  Non  dissimulas  te  a  nobis  adhuc  dissidere:  et  tamen  vis  locum  tibi  destinari  ad  docendum.  Tu  ipse  perpende  quantopere  istud  deceat.  Nos  vero  plusquam  stipites  merito  iudicares,  si  tibi  obsequeremur.  Ut  finem  aliquando  faciam,  peto  abs  te,  ut  animo  composito  ac  sedato  tecum  dispi-