23:736  [pag.  208]  Car  selon  que  nous  avons  cognu  la  bonte  de  Dieu  et  son  aide,  et  secours,  tant  plus  devons-nous  estre  asseurez  de  luy  pour  le  temps  a  venir.  Voila  donc  comme  l'experience  du  temps  passe  nous  doit  tousiours  mieux  certifier:  et  c'est  aussi  ou  Dieu  pretend  disant,  Ie  fay  tire  de  Ur  en  Chaldee.  Ce  n'est  pas  d'auiourd'huy  que  ie  me  suis  monstre  estre  ton  Dieu,  mais  tu  as  senti  que  ie  t'ay  soustenu  de  ma  main  forte,  tu  estois  plonge  en  perdition,  tu  estois  une  povre  ame  damnee,  et  ie  t'ay  retire  a  moy,  a  fin  de  te  faire  parvenir  a  salut.  Puis  qu'ainsi  est  donc,  que  ie  t'ay  retire  comme  du  profond  d'enfer,  maintenant  que  ma  grace  que  tu  as  sentie,  te  soit  une  forteresse  invincible:  et  aussi  de  ma  partie  la  continueray.  Or  il  est  certain  que  Dieu  nous  donne  aussi  ceste  reigle  en  general,  c'est  qu'une  grace  qu'il  nous  aura  faite,  attire  l'autre.  Car  il  ne  se  lasse  iamais,  et  c'est  une  fontaine  qui  ne  se  peut  tarir,  que  nous  en  puisons  hardiment,  et  nous  trouverons  tousiours  dequoy  nous  rassasier  de  plus  en  plus.  Voila  donc  qu'emporte  ce  mot:  Ie  suis  l'Eternel  qui  t'ay  tire  de  Ur  de  Chaldee.  Apres  que  Dieu  a  mis  en  avant  sa  maieste,  et  qu'il  a  monstre  qu'il  est  Createur  du  ciel  et  de  la  terre,  il  amene  ceci  d'especial,  c'est,  qu'Abram  l'avoit  senti  et  cognu  tel,  quant  il  l'avoit  retire  de  l'abisme  auquel  il  [pag.  209]  estoit,  et  il  adiouste  que  c'est  pour  posseder  la  terre  en  heritage.  Ici  comme  desia  nous  avons  touche,  Dieu  renouvelle  toutes  ses  promesses  qu'il  avoit  donnees  a  son  serviteur  Abram,  a  fin  qu'il  en  face  un  recueil.  Car  la  foy  doit  avoir  ce  privilege  d'amasser  tout  ce  qui  la  doit  munir  contre  les  tentations  et  les  assaux  de  Satan.  Voila  qui  est  cause  de  la  ruine  de  beaucoup  de  gens,  c'est  leur  nonchallance:  car  comme  i'ay  dit,  ils  cuident  estre  grans  docteurs,  quand  ils  auront  aprins  une  sentence  de  l'Escriture  saincte,  il  leur  semble  qu'ils  en  savent  assez.  Mais  quoy?  Quand  se  vient  au  besoin,  ils  monstrent  qu'ils  sont  vuides:  car  le  diable  ne  sauroit  trouver  si  petit  pertuis  pour  avoir  entree  en  eux,  qu'il  ne  les  empoisonne  de  son  venin  mortel:  tout  ainsi  comme  s'il  y  a  une  tuille  cassee  sur  un  toict,  la  pluye  qui  entrera  par  la,  par  succession  de  temps  pourrira  la  maison.  Ainsi  en  est-il  de  ceux  qui  pensent  avoir  trop  d'intelligence  et  demourent  la  stupides:  le  diable  puis  apres  trouve  des  pertuis  par  lesquels  il  entre,  tellement  que  l'edifice  s'en  va  ruiner.  Or  il  ne  faut  pas  que  nous  soyons  lasches  a  profiter,  mais  il  faut  que  nous  facions  un  amas  et  un  recueil  de  toutes  les  promesses  de  Dieu,  et  que  nous  en  sentions  tousiours  le  fruict:  et  non  seulement  cela,  mais  aussi  que  nous  taschions  d'augmenter  [pag.  210]  tousiours  nostre  foy  comme  elle  en  a  besoin,  d'autant  qu'elle  sera  tousiours  debile:  brief,  que  nous  marchions  tousiours  plus