50:73  73  CAPUT  V.  74  possimus,  nisi  constet  a  Deo  esse  ordinatos,  Deumque  nobis  per  ipsos  loqui.  Atque  huc  pertinent  elogia  quibus  Christus  ipse  apostolos  insignit:  Qui  vos  audit,  me  audit,  etc.  Quidquid  solveritis  in  terra,  solutum  erit  in  coelis.  Et  similia.  Rogamus  pro  Christo.  Hinc  colligimus  quam  merito  exclamet  Iesaias  (52,  7),  beatos  esse  pedes  evangelizantium.  Nam  quod  unum  ad  plenam  felicitatem  nobis  satis  est,  et  sine  quo  sumus  miserrimi,  nonnisi  per  evangelium  nobis  confertur.  Quod  si  iniunctum  est  omnibus  ecclesiae  ministris  hoc  officium,  ita  ut  neque  apostolus  neque  pastor  habendus  sit,  qui  hanc  legationem  non  obit  :  hinc  iudicare  promptum  est  qualis  sit  tota  papae  hierarchia:  volunt  quidem  censeri  apostoli  et  pastores  :  sed  quum  muta  sint  idola,  qui  conveniet  eorum  iactantia  cum  hoc  Pauli  loco?  Rogandi  verbum  incomparabilem  gratiae  Christi  commendationem  exprimit,  dum  eousque  se  demittit,  ut  nos  rogare  non  gravetur.  Quominus  excusabilis  est  nostra  pravitas,  nisi  ad  totam  mansuetudinem  dociles  et  morigeros  nos  statim  praebemus.  Reconciliemini.  Observandum  hic,  Paulo  negotium  esse  cum  fidelibus.  Testatur  se  quotidie  ad  illos  perferre  hoc  mandatum.  Non  ergo  passus  est  Christus,  ut  semel  tantum  peccata  nostra  expiaret  :  neque  in  hoc  institutum  evangelium,  ut  quae  ante  baptismum  admiserimus  peccata,  nobis  remittantur:  sed  quemadmodum  quotidie  peccamus,  ita  etiam  quotidiana  remissione  a  Deo  recipiamur  in  gratiam.  Haec  enim  perpetua  est  legatio,  quae  resonare  assidue  debet  in  ecclesia  usque  ad  finem  mundi  :  nec  aliter  praedicari  evangelium  potest  quin  promittatur  peccatorum  remissio.  Habemus  hic  proprium  et  aptum  testimonium  refellendae  impiae  papistarum  opinioni,  quae  remissionem  peccatorum  aliunde  petere  post  baptismum  iubet  quam  ab  expiatione  in  Christi  morte  peracta.  Atqui  hoc  tritum  est  in  omnibus  scholis  papisticis  dogma,  nos  a  baptismo  mereri  peccatorum  remissionem  poenitentia,  intercedente  clavium  beneficio.  Quasi  vero  baptismus  ipse  nobis  illam  absque  poenitentia  conferat.  Sed  poenitentiae  nomine  intelligunt  satisfactiones.  Quid  autem  hic  Paulus?  non  minus  post  baptismum  quam  ante  nos  ad  unicam  illam  Christi  expiationem  revocat,  ut  sciamus  gratuito  semper  nobis  obvenire.  Illud  vero  discrimen,  quod  fabricarunt,  tanquam  sibi  incognitum  praeterit.  De  clavium  porro  dispensatione  quidquid  garriunt,  vanum  est:  quia  claves  absque  evangelio  imaginantur,  quum  nihil  sint  quam  hoc  gratuitae  reconciliationis  testimonium,  quod  nobis  ex  evangelio  redditur.  21.  Eum  qui  peccatum  non  noverat.  Videsne  ut  non  alia,  autore  Paulo,  sit  reditio  in  gratiam  cum  Deo,  nisi  quae  in  solo  Christi  sacrificio  fundata  est?  Ergo  huc  semper  discamus  animum  referre,  quoties  a  reatu  cupimus  absolvi.  Iam  apertius  docet  quod