7:726  Quae  ego  hic  addidi  non  sic  addidi  ut  his  vestris  loquutionibus  adeo  offendar,  quum  facile  ex  his  meis  intelligas  quo  sensu  ego  a  vobis  positas  esse  iudicem,  sed  volui  perpendere  omnino  quid  simpliciores,  rudiores,  suspiciosiores,  contentiosiores  offendere  potuerit,  ne  fortassis,  dum  ego  pro  tollendis  laboro  suspicionibus,  hisce  propositis  nutrirem  magis.  Quae  utinam  tandem  cessent.  Videor  mihi  videre  vos  idem  sentire  quod  nos.  Abhorrere  utique  ab  his  erroribus  qui  hactenus  tolerari  et  dissimulari  non  potuerunt,  utpote  de  corporali  corporis  Christi  praesentia  et  humanitatis  ipsius  in  ubiquitatem  extensione,  item  ab  alligatione  gratiae  ad  sacramenta.  In  quibus  duobus  articulis,  meo  iudicio,  omnis  hactenus  constitit  controversia.  Utinam  ergo  in  loquutionibus  etiam  convenire  possimus  talibus,  quae  nihil  veteris  fermenti  saperent,  sed  ad  ecclesiae  aedificationem  essent  appositae,  ut  non  modo  idem  sentiremus  sed  et,  iuxta  quod  apostolus  monet,  loqueremur.  Dominus  tribuat  nobis  spiritum  suum,  qui  est  unitatis  et  concordiae  spiritus,  ne  afflictissimam  alias  ecclesiam  nostris  magis  affligamus  contentionibus.  Amen.