9:724  aut  evenire  possit  absque  eius  consilio  ac  providentia.  Et  quamvis  Satan  ac  reprobi  moliantur  rerum  omnium  confusionem,  ipsique  adeo  fideles  suis  peccatis  rectum  ordinem  pervertant,  Deum  tamen  agnosco,  ut  supremum  omnium  principem  ac  dominum,  mala  convertere  in  bonum:  omnia  denique  velut  habenis  quibusdam  secretis  regere,  et  admirabili  quadam  ratione  moderari,  quam  nos  oportet  cum  omni  animi  submissione  adorare,  quoniam  mente  illam  complecti  non  possumuia.  Confiteor  hominem  conditum  fuisse  ad  imaginem  Dei,  id  est,  praeditum  plena  integritate  spiritus,  voluntatis  omniumque  animae  partium,  facultatum  ac  sensuum  :  omnem  autem  nostram  corruptionem  et  vitia  quibus  laboramus  inde  profluxisse  quod  Adam,  communis  omnium  hominum  pater,  sua  rebellione  sese  a  Deo  alienavit,  et  vitae  bonorumque  omnium  fonte  derelicto  sese  omnibus  miseriis  obnoxium  fecit.  Quo  fit  ut  singuli  nascamur  originis  peccato  infecti,  et  ab  ipso  matris  utero  a  Deo  maledicti  ac  damnati,  non  propter  alienum  delictum  duntaxat,  sed  propter  improbitatem  quae  intra  nos  est  tum  quoque  quum  non  apparet.  Confiteor  originis  peccato  comprehendi  mentis  caecitatem  et  cordis  perversitatem,  adeo  ut  penitus  spoliati  ac  destituti  simus  iis  quae  ad  vitam  aeternam  spectant,  ipsaque  adeo  naturalia  dona  omnia  sint  in  nobis  depravata  et  contaminata.  Quo  fit  ut  nulla  ad  bene  agendum  cogitatione  penitus  moveamur.  Itaque  detestor  eos  qui  nobis  aliquid  liberi  arbitrii  attribuunt,  quo  nos  ipsos  praeparemus  ad  recipiendam  Dei  gratiam,  aut  tanquam  ex  nobis  cooperemur  virtuti  quae  nobis  donatur  a  spiritu  sancto.  Confiteor  Iesum  Christum  datum  esse  nobis  infinita  Dei  bonitate,  quo  remedio  revocemur  a  morte  in  vitam,  et  recipiamus  quidquid  in  Adamo  nobis  deperiit.  Ac  proinde  eum  qui  est  sapientia  aeterna  Dei  patris,  et  unius  cum  eo  essentiae,  induisse  nostram  carnem,  ita  ut  sit  Deus  et  homo  in  una  persona.  Idcirco  detestor  omnes  haereses  huic  principio  contrarias,  puta  Marcionis,  Manetis,  Nestorii,  Eutychetis,  et  similium,  una  cum  deliriis  quae  Servetus  et  Schuenfeldius  voluerunt  instaurare.  Quod  attinet  ad  rationem  adipiscendae  salutis,  confiteor  Iesum  Christum  sua  morte  ac  resurrectione  cumulatissime  perfecisse  quidquid  ad  delendas  nostras  offensas  requirebatur,  ut  nos  Deo  patri  reconciliaret:  et  mortem  ac  Satanam  superasse,  ut  ipsius  victoriae  fructum  percipiamus:  denique  spiritum  sanctum  absque  mensura  accepisse,  ut  cuique  ex  suis  ex  eo  largiatur  ea  mensura  qua  ipsi  libuit.