58:72  desdaignent  leurs  freres,  les  voians  ignorans  ?  C'est  d'autant  qu'il  leur  semble  qu'il  n'y  a  que  redire  en  eux:  mais  si  nous  cognoissons  que  c'est  d'aspirer  a,  nostre  Seigneur  Iesus  Christ,  et  de  parvenir  a  la  gloire  de  sa  resurrection,  nous  dirons  tousiours  avec  saint  Paul,  que  nous  n'y  sommes  pas  parvenus.  Quand  donc  chacun  cognoistra,  qu'il  y  a  encores  quelque  chose  a  redire  en  lui,  il  ne  nous  fera  point  mal,  et  ne  trouverons  point  estrange  d'appeler  nos  freres,  encore  que  ce  soit  de  loin,  Or  sus,  marchons.  Il  est  vray  qu'il  y  a  longue  distance  entre  ceux  qui  auront  le  don  d'interpreter  l'escriture  sainte,  d'avec  ceux  qui  sont  simples  et  povres  idiots  :  ils  cognoistront  bien  qu'il  y  a  un  Dieu,  qui  leur  est  Pere,  en  nostre  Seigneur  Iesus  Christ:  mais  tant  y  a  qu'ils  ne  sauroient  point  traiter  un  passage  de  l'escriture  saincte:  cependant  si  ne  laissent-ils  pas  de  tenir  tousiours  un  mesme  chemin:  et  ceux  qui  sont  les  plus  avancez,  combien  qu'ils  parvienent  plustost  au  but,  ils  attendront  tousiours  les  autres.  Voila  comme  il  nous  en  faut  faire,  selon  qu'il  nous  est  monstre,  et  que  nous  le  pouvons  apprendre  de  l'exemple  qui  est  ici  contenu.  Or  nous-nous  prosternerons  devant  la  Maieste  de  nostre  bon  Dieu  en  cognoissance  de  nos  fautes,  le  priant  qu'il  nous  les  face  tellement  sentir,  que  ce  soit  pour  nous  y  desplaire,  et  que  nous  regardions  tousiours  a  nostre  condition,  qui  est  si  miserable,  afin  d'avoir  nostre  refuge  a  sa  misericorde:  et  qu'il  lui  plaise  nous  recevoir  a,  merci,  nous  gouverner  tellement  par  son  sainct  Esprit,  que  ce  soit  pour  nous  despouiller  de  toutes  nos  passions  terrestres.  Et  voiant  qu'il  y  a  tant  de  vices  cachez  en  nous,  que  nous  prenions  tant  plus  de  peine  a  nous  examiner,  afin  d'avoir  tousiours  recours  a  celui  qui  nous  en  peut  purger,  et  que  nous  combations  tellement  contre  tout  ce  qui  nous  empesche  de  nous  adonner  pleinement  a  son  service,  que  cependant  nous  cognoissions  qu'il  s'en  faut  beaucoup  que  nos  combats  meritent  d'estre  approuvez  de  lui,  sinon  d'autant  qu'il  nous  supporte  en  nos  foiblesses.  Et  aussi  que  nous  recourions  a  sa  vertu,  sachans  le  besoin  que  nous  avons  d'estre  secourus  de  lui:  et  que  nous  apprenions  par  ce  moien  de  nous  glorifier  en  lui  seul,  et  ne  douter  point  que  comme  il  nous  a  une  fois  tendu  la  main,  qu'il  ne  continue  a  nous  fortifier  tousiours  de  plus  en  plus,  iusques  a  ce  que  nous  aions  surmonte  le  diable,  et  tous  les  combats  qu'il  nous  peut  dresser.  Que  non  seulement,  etc.