50:72  quoque  est  cognitu  necessarium,  Christum  nobis  ex  fonte  gratuitae  Dei  misericordiae  prodiisse:  utrumque  diserte  docet  scriptura:  iram  patris,  filii  sacrificio  fuisse  placatam,  et  ideo  filium  expiandis  hominum  peccatis  fuisse  oblatum  :  quia  Deus  illorum  misertus  tali  pignore  receperit  eos  in  gratiam.  Summa  haec  sit,  ubi  est  peccatum,  illic  esse  iram  Dei:  non  aliter  igitur  neque  ante  Deum  nobis  esse  propitium  quam  ubi  peccata  nostra  delet  non  imputando.  Hoc  beneficium  quum  nequeant  apprehendere  nostrae  conscientiae,  nisi  intercedente  Christi  sacrificio:  in  illo  Paulus  non  abs  re  statuit  principium  et  causam  reconciliationis,  nostri  respectu.  Et  deposuit  in  nobis.  Iterum  repetit  perferendae  ad  nos  huius  gratiae  datum  esse  mandatum  evangelii  ministris.  Obiici  enim  poterat:  Ubi  nunc  Christus  inter  Deum  et  nos  pacificator?  quam  procul  a  nobis  habitat?  Dicit  ergo,  sicuti  semel  passus  est,  ita  quotidie  passionis  suae  fructum  nobis  offerre  per  evangelium,  quod  exstare  voluit  in  mundo,  tanquam  firmas  et  authenticas  tabulas  pacificationis  semel  peractae.  Ministrorum  ergo  partes  sunt,  fructum  mortis  Christi  nobis  applicare,  ut  ita  loquar.  Sed  ne  quis  magicam  applicationem  somniet,  qualem  papistae  comminiscuntur:  notandum  diligenter  quod  proxime  subiicit,  totum  id  consistere  in  praedicatione  evangelii.  Papa  enim  cum  suis  sacrificis  hoc  colore  praetexit  totam  illam  impiam  et  exsecrandam  nundinationem,  quam  de  animarum  salute  exercent.  Instruxit  nos,  inquiunt,  Dominus  mandato  et  potestate  remittendi  peccata  :  fateor,  si  legatione  hac  fungantur,  cuius  Paulus  meminit.  Porro  absolutio,  qua  utuntur  in  papatu,  prorsus  est  magica:  deinde  veniam  peccatorum  includunt  in  plumbo  et  membrana,  vel  commentitiis  et  frivolis  superstitionibus  alligant.  Quid  haec  omnia  simile  habent  cum  Christi  instituto?  Tum  ergo  nos  in  Dei  gratiam  rite  et  ordine  restituunt  ecclesiae  ministri,  quum  per  evangelium  nobis  testes  sunt  de  reconciliata  nobis  Dei  gratia.  Hoc  testimonio  sublato,  nihil  restat  praeter  meram  imposturam.  Cave  igitur,  extra  evangelium  vel  minimam  fiduciae  tuae  guttam  colloces.  Non  nego  quidem,  sacramentis  etiam  Christi  gratiam  nobis  applicari,  illicque  nostram  cum  Deo  reconciliationem  conscientiis  nostris  sanciri.  Sed  quia  sacramentis  insculptum  est  evangelii  testimonium,  non  sunt  per  se  neque  seorsum  aestimanda,  sed  cum  evangelio  coniungi  debent,  cuius  sunt  appendices.  Denique  hac  conditione  legati  sunt  ministri  ecclesiae,  ad  beneficium  reconciliationis  testandum  et  publicandum,  si  ex  evangelio  tanquam  ex  legitimis  tabulis  loquantur.  20.  Tanquam  Deo  exhortante.  Hoc  ad  fidem  legationi  adstruendam  non'  parum  valet:  imo  penitus  necessarium  est.  Quis  enim  hominis  testimonio  acquiescat  de  aeterna  sua  salute?  Maior  res  est  quam  ut  hominum  pollicitatione  contenti  esse