45:72  laum  a  morte  patris  Herodis  novem  annos  regnasse.  Unde  conficitur,  inter  Christi  natalem  et  censum  illum  elapsos  fuisse  annos  circiter  tredecim.  Subscribunt  enim  fere  omnes  Epiphanio  qui  tradit,  Christum  tricesimo  tertio  Herodis  anno  esse  natum,  hoc  est,  ante  illius  mortem  annis  quatuor.  Hoc  quoque  nonnihil  perplexum  est,  quod  idem  Iosephus  cap.  3  libr.  18  censum  hunc  incidisse  dicit  in  annum  tricesimum  septimum  actiacae  victoriae.  Quod  si  verum  est,  supervixit  Augustus  annis  fere  septem  ad  summum.  Ita  ex  aetate  octo  vel  novem  anni  detracti  erunt:  patebit  enim  ex  Lucae  3.  cap.,  non  nisi  quindecim  tunc  fuisse  annorum.  Caeterum  quum  notior  fuerit  Christi  aetas  quam  ut  in  quaestionem  vocari  debeat,  Iosephum  hac  in  parte,  ut  aliis  compluribus,  memoria  lapsum  fuisse  vero  absimile  non  est.  Et  sane  Quirinium  annales  docent  annis  novendecim  aut  circiter  ante  fuisse  consulem  quam  devicto  Antonio  solus  imperio  potiretur  Augustus:  ita  valde  senex  in  provinciam  missus  foret.  Adde  quod  intra  octo  annos  quatuor  Iudaeae  praesides  numerat  idem  Iosephus,  quum  fateatur,  quintum  annis  undecim  praefuisse:  is  fuit  Valerius  Gratus,  cui  Pontius  Pilatus  successit.  Quanquam  alia  potest  afferri  solutio,  quod  censum  peragere  non  statim  licuerit,  ex  quo  edictus  fuerat:  narrat  enim  Iosephus,  Coponium  cum  exercitu  missum  esse,  qui  Iudaeos  comprimeret.  Unde  facile  colligitur,  censum  populi  tumultu  fuisse  ad  tempus  impeditum,  et  verba  Lucae  hoc  patiuntur,  quod  sub  tempus  nativitatis  Christi  edictum  exierit  de  populo  censendo,  descriptio  autem  fieri  non  potuerit  nisi  mutato  regni  statu,  quum  in  partem  provinciae  redacta  esset  Iudaea.  Ita  hoc  posterius  membrum  vice  correctionis  additum  erit:  Haec  descriptio  prima  fuit  praeside  Cyrenio,  hoc  est,  tunc  primum  ad  effectum  perducta  est.  Quanquam  nondum  soluta  est  tota  quaestio,  nam  quum  Iudaeam  Herodes  teneret,  quorsum  attinuit  populum  censeri,  qui  tributum  Romano  imperio  nullum  pendebat?  Respondeo,  nihil  esse  absurdi,  si  Augustus,  ut  iugo  assuefaceret  Iudaeos,  quorum  pius  satis  nota  erat  pervicacia,  censeri  voluerit  etiam  sub  Herode.  Nec  obstitit  peculiare  Herodis  regnum,  quin  tributi  nomine  aliquid  in  singula  capita  Romano  imperio  penderent  Iudaei.  Scimus  enim,  Herodem  tantum  precario  et  propemodum  serviliter  regnasse.  Nescio,  unde  sumpserit  Eusebius  quod  docet,  censum  hunc  senatusconsulto  decretum  fuisse.  7.  Non  erat  locus  in  diversorio.  Hic  videmus  non  modo,  quanta  fuerit  inopia  Ioseph,  sed  etiam  quam  acerba  fuerit  tyrannis,  quod  nulla  excusatio  recipitur,  quin  cogatur  Ioseph  uxorem  partui  vicinam  adverso  tempore  secum  trahere.  Credibile  autem  est,  qui  ex  regio  genere  progeniti  erant,  asperius  et  magis  contumeliose  reliquis  fuisse  trac-