30:72  sed  quam  Saulis  superbia  non  recipiebat.  Hinc  discunto,  qui  ad  summos  honores  evecti  sunt,  cavere  ne  sua  arrogantia  reiiciant  sibi  vel  ab  ignaris  vel  abiectae  conditionis  hominibus  factas  admonitiones:  nam  certum  est  inde  maximam  partem  corruptelarum  in  iudiciis  contingere,  quum  superbia  et  arrogantia  iudices  sic  excaecantur,  ut  miserorum  hominum  querelas  vel  admonitiones  non  audiant.  Deinceps  vero  dicitur  populus,  etiam  iure  iurando  Saulis  exsecrationi  contrario,  affirmasse  Ionathanum  minime  moriturum.  Hactenus  magnam  huius  populi  obedientiam  audivimus,  imo  potius  stuporem  quendam,  quo  factum  est,  ut  nemo  ex  toto  populo  respondere  Sauli  sit  ausus.  At  quum  Ionathanum  de  vita  periclitari  animadvertit,  remque  istam  a  Saule  serio  agi,  tum  sese  aperte  regis  conatibus  opposuit,  Ionathanumque  non  esse  moriturum  iuramento  confirmavit.  Profecto  minime  dubium  est  quin  Deo  impellente  populus  ita  sese  iuramento  adstrinxerit  ad  Ionathanum  morti  eripiendum,  ut  Saul  arrogantiae  suae  poenas  daret:  ut  si  forte  iuramentum  suum  locum  habere  vellet,  contrario  iuramento  impediretur,  populusque  multitudine  vinceret.  Nempe  ut  dicerent  se  omnes  iurasse,  ac  proinde  non  posse  in  ipsius  sententiam  descendere:  quod  solus  ipse  nihil  ad  illos  omnes  posset:  atque  ita  provideretur  Ionathano  ne  vita  mulctaretur.  Porro  quaeri  potest,  rectene  fecerit  populus  iuramento  contrario  Saulis  iuramentum  oppugnans.  Ad  quam  quaestionem  respondendum  est,  in  rebus  divinis  homines  caecutire:  ac  proinde  oportere  illos  quum  de  arcanis  Dei  consiliis  agitur,  ori  suo  digitum  apponere,  et  iis  contentos  esse  quae  nobis  Deus  verbo  suo  patefacit.  Nam  quum  Deus  admirabili  quodam  consilio  suo  istiusmodi  quaedam  exempla  ad  nostram  instructionem  edidit,  non  ideo  tamen  sequitur  homines  ea  facientes  non  deflectere  a  recto  tramite,  licet  eorum  opera  Deus  ad  suum  implendum  consilium  usus  sit.  Verum  tamen  lex  Domini  semper  integra  et  illibata  manet:  quamobrem  istiusmodi  quaestiones  relinquendae  sunt  tanquam  vanae  et  inutiles,  imo  et  impiae,  si  quis  illis  ad  effugia  quaerenda  velit  abuti  rectene  an  male  populus  fecerit.  Sufficiat  nobis  Deum  ea  ratione  voluisse  Ionathanum  eripi  mortis  periculo,  quum  iam  iam  morti  destinatus  sepulcro  imminere  videretur,  ut  Saulis  tyrannis  eo  modo  puniretur.  Caeterum  populus  causam  speciosam  adiicit,  Ionathanum  fecisse  salutem  magnam  in  Israele,  et  cum  Deo  esse  illo  die  operatum.  Quibus  verbis  indicat  populus  in  Deum  ipsum  iniuriam  redundaturam,  si  in  eum,  cuius  opera  esset  usus  ad  salutem  populo  adferendam,  saeviretur.  Sane  saepe  quidem  accidit,  ut  res  magnas  quidam  gerant,  et  memoria  dignas,  qui