10.1:72  Inter  se  mutuam  ac  vere  christianam  concordiam  so  vento.  Alii  alios  inter  docendum  nullo  modo  lacessunto.  Si  quid  controversiae  incident,  ad  scholae  Rectorem  [pag.  12]  referimto,  et  christiane  causam  suam  agunto.  Is  nisi  statim  componere  litem  potuerit,  ad  ministrorum  collegium  referto,  qui  suam  autoritatem  interponant.  DE  LUDIMAGISTRO.  Ludimagister  ita  uti  diximus  eligitor  ac  confirmator,  pietatis  perspectae  et  doctrinae  saltem  mediocris,  ac  quidem  in  primis  natura  leni  praeditus,  et  minime  asperis  moribus,  ut  omnibus  scholasticis  exemplo  vitae  praeire  et  sui  muneris  molestias  moderate  sustinere  possit.  Eius  munus  esto,  praeter  ordinariam  suae  classis  procurationem,  in  collegarum  mores  ac  diligentiam  inspicere,  cessantes  excitare,  omnes  officii  admonere,  publicis  in  aula  communi  castigationibus  praeesse,  curare  denique  ut  tempestive  quoties  opus  erit  campana  pulsetur,  et  singula  auditoria  munda  et  nitida  appareant.  Eo  inconsulto  nihil  prorsus  novi  tentare  hypodidascalis  fas  esto.  Is  vero  de  omnibus  quae  inciderint  ad  Rectorem  referto.  DE  SCHOLASTICIS  GYMNASII.  Ludimagister  et  hypodidascali  scholasticos  omnes  privatae  scholae  in  quatuor  partes,  non  pro  classium  ratione,  sed  pro  regionum  urbis  situ  distribuunto.  Singulas  in  suo  catalogo  annotanto,  et  eum  catalogum  totidem  hypodidascalis  tradunto:  deinde  sua  cuique  templo  pars  scholasticorum  pro  viciniae  ratione  assignator.  [pag.  13]  In  singulis  templis  ex  amplissimi  Senatus  autoritate  suus  scholasticis  locus  constituitur:  eumque  cuiquam  alii  occupare  nefas  esto.  Singuli  scholastici  diebus  Mercurii  mane,  Dominicis  autem  mane,  et  hora  Catechismi,  itemque  pomeridiana  concione,  mature  in  suum  quisque