23:718  continue  tout  le  temps  de  nostre  vie.  Car  combien  que  nous  ayons  profite  au  service  de  Dieu,  si  est-ce  qu'encores  il  y  a  tousiours  des  imperfections.  Il  faut  donc  que  la  foy  nous  iustifie  simplement.  Et  ici  il  nous  faut  abatre  ceste  folle  opinion  et  perverse  des  Papistes  qui  cuident  en  partie  estre  iustifiez  par  leurs  oeuvres,  et  en  partie  par  la  remission  qu'ils  obtienent  de  la  grace  de  Dieu:  car  il  faut  qu'en  tout  et  par  tout  Dieu  nous  recoyve  a  merci,  comme  il  a  este  monstre.  Et  pourquoy  ?  La  partie  de  nos  oeuvres  ne  merite  rien:  et  puis  qu'il  n'y  a  pas  une  seule  oeuvre  qui  ne  soit  vicieuse,  quand  il  seroit  question  d'en  iuger  selon  la  dignite  qu'il  y  trouve.  En  tout  et  par  tout  donc  nous  voila  exclus.  Ainsi  il  faut  venir  a  ce  poinct,  c'est  assavoir,  que  les  plus  iustes,  quand  ils  sembleroyent  des  Anges,  il  faut  qu'ils  soyent  acceptez  de  Dieu  gratuitement.  Or  ici  on  pourroit  faire  une  obiection  :  car  si  est-ce  que  ceux  que  Dieu  a  desia  appelez  sont  bien  differens  de  ceux  qui  sont  du  tout  alienez  de  luy,  et  mesmes  il  y  a  grande  distance  et  diversite  entre  l'homme  fidele  quand  Dieu  l'a  remis  au  droit  chemin,  et  quand  il  l'avoit  delaisse  selon  la  corruption  de  sa  nature.  Voila  un  homme  qui  aura  vescu  pour  quelque  espace  de  temps  comme  une  brebis  esgaree  et  comme  une  creature  perdue:  et  bien,  Dieu  le  vient  illuminer  [pag.  171]  par  son  Evangile,  il  le  touche  et  le  reforme  en  sorte  qu'on  verra  comme  une  nouvelle  creature,  ainsi  que  l'Escriture  en  porte.  Et  de  fait  nous  ne  pouvons  pas  estre  Chrestiens  que  nous  ne  soyons  renouvelez  en  telle  sorte,  et  que  nous  ne  soyons  la  facture  de  Dieu,  creez  en  nostre  Seigneur  Iesus  Christ:  pour  faire  les  oeuvres  que  Dieu  a  preparees,  il  faut,  di-ie,  que  tout  cela  y  soit.  Or  maintenant  il  semble  qu'il  y  ait  ici  de  l'absurdite.  Dieu  iustifie  le  brigand  qui  est  pendu  pource  qu'il  recognoist  son  salut  en  Iesus  Christ:  et  quand  il  est  iustifie,  n'a-il  pas  une  autre  qualite  en  soy  qu'il  n'avoit  auparavant?  Ouy  bien.  Pourquoy  donc  disons-nous  que  la  iustice  gratuite  a  son  cours  et  son  train  toute  la  vie  de  l'homme?  Or  l'homme  fidele  pour  le  moins  aura  bonne  affection  de  se  renger  a  l'obeissance  de  Dieu,  il  se  desplaira  en  ses  vices,  voire  et  en  gemira,  et  son  principal  desir  sera  de  tousiours  conformer  sa  vie  a  la  Loy.  Quand  donc  l'homme  fidele  est  tel,  il  ne  faut  pas  dire  qu'il  est  iustifie  comme  il  a  este  du  premier  coup,  pour  ce  qu'il  estoit  debauche  alors,  et  qu'il  estoit  du  tout  aliene  de  Dieu.  Or  la  response  a  ceci  est,  quand  Dieu  nous  iustifie  du  commencement,  c'est  a  dire,  qu'il  nous  recoit  a  merci,  nous  retirant  de  la  damnation  en  laquelle  nous  avons  este,  que  la  il  [pag.  172]  use  d'un  pardon  general:  et  puis  quand  il  nous  iustifie  apres,  ce  n'est  pas  qu'il  ne  recognoisse  les  biens  qu'il  a  mis  en  nous,  qu'il  ne  les  avoue  et  les  approuve,  car  il  ne  se  peut