23:716  bien  conceu  pleine  fiance  que  Dieu  le  recevra  a  mercy:  et  en  cela  il  est  hardi  comme  il  nous  le  faut  estre  aussi,  selon  qu'il  est  escrit  au  troisieme  chapitre  des  Ephesiens.  Mais  quand  il  se  regarde,  il  baisse  la  teste,  il  est  confus,  et  ne  demande  sinon  pardon:  et  Iesus  Christ  [pag.  166]  dit,  qu'a  ce  seul  mot  il  a  este  iustifie.  Voila  cependant  le  Pharisien  qui  est  reiette,  d'autant  qu'il  a  apporte  ceste  folle  presumption  de  ses  oeuvres.  Et  le  Publicain  qui  confesse  purement  et  simplement  qu'il  est  un  povre  damne,  le  voila  iuste  devant  Dieu:  et  toutesfois  le  Pharisien  ne  s'estoit  point  attribue  la  louange  de  ses  merites,  il  n'a  pas  dit,  i'ay  fait  ceci  et  cela,  et  Dieu  en  est  tenu  a  moy:  mais  tant  seulement,  Seigneur  ie  te  rends  graces  de  ce  que  ie  ne  suis  point  larron,  ne  brigand,  ne  un  homme  dissolu,  et  mesmes  comme  est  cestuy-ci.  Voila  une  belle  entree  ce  semble  quand  il  se  remet  du  tout  a  Dieu,  et  proteste  que  tout  le  bien  et  toutes  les  vertus  qu'il  a  vienent  de  pur  don  de  son  sainct  Esprit:  mais  quoy?  Il  ne  laisse  pas  d'estre  enfle  de  ceste  outrecuidance,  que  par  ses  merites  il  est  approuve.  Ainsi  donc  voila  pourquoy  Dieu  le  condamne:  car  il  faut  bien  qu'il  soit  stupide  tant  et  plus,  quand  il  pense  a  tenir  Dieu  oblige  a  cause  de  ses  oeuvres.  Il  ne  reste  donc  sinon  d'avoir  nostre  refuge  a  la  pure  misericorde  de  Dieu,  et  alors  nous  serons  asseurez  qu'il  nous  aimera,  quand,  di-ie,  nous  cercherons  tous  nos  merites  en  Iesus  Christ,  et  que  nous  ne  laisserons  point  d'invoquer  Dieu  quelque  indignite  qu'il  y  ait  en  nous,  d'autant  que  ce  n'est  point  a  cause  de  nos  personnes  [pag.  167]  ne  de  nos  oeuvres  qu'il  nous  a  adoptez,  mais  que  c'est  sa  pure  et  gratuite  misericorde:  voila  comme  nous  serons  asseurez  de  nostre  salut.  Or  il  est  bien  vray  que  nous  aurons  tousiours  quelques  scrupules,  comme  la  foy  n'est  iamais  parfaicte  en  nous:  mais  tant  y  a  qu'encores  tousiours  l'asseurance  surmonte,  quand  nous  combatons  vertueusement  et  que  nous  embrassons  les  promesses  de  Dieu,  que  nous  en  faisons  bouclier  a  l'encontre  de  toutes  tentations,  et  de  toutes  les  deffiances  que  le  diable  nous  propose.  Quand  donc  nous  parlons  de  ceste  certitude  de  foy,  nous  n'entendons  pas  qu'il  n'y  ait  rien  pour  nous  esbranler,  et  que  quelque  fois  nous  n'ayons  de  grandes  perplexitez  et  destresses  en  nous  :  mais  nous  entendons  qu'en  la  fin  nous  concluons  quoy  qu'il  en  soit  que  Dieu  aura  pitie  de  nous,  et  l'invoquons  sur  cest  arrest-la.  C'est  donc  ce  que  maintenant  nous  avons  a  retenir.  Or  par  cela  nous  voyons  aisement  que  ceux  qui  ont  pris  ce  mot  de  iustifier,  pour  dire  que  Dieu  nous  change,  et  qu'il  nous  gouverne  par  son  sainct  Esprit,  a  fin  que  nous  le  servions,  se  sont  trop  lourdement  abusez:  car  il  y  en  a  bien  qui  confesseront  que  nous  ne  sommes  point  iustes  par  nos  merites,  que  nous  n'avons  point  une  seule  goute