45:71  71  HARMONIA  EVANGELICA.  72  xnoriam  simul  venire  debet,  quid  multis  ante  saeculis  praedictum  fuerit  a  propheta,  et  comparatio  clare  ostendet,  non  sine  admirabili  Dei  providentia  censum  tunc  fuisse  edictum  a  Caesare  Augusto,  et  Ioseph  et  Mariam  domo  pedem  movisse,  ut  ipso  temporis  articulo  venirent  in  Bethlehem.  Ita  videmus  sanctos  interdum  Dei  servos,  etiamsi  mente  vagentur  inscii  quorsum  tendant,  rectam  tamen  viam  tenere,  quia  Deus  eorum  pedes  dirigit.  Nec  minus  in  eo  se  profert  admirabilis  Dei  providentia,  quod  tyrannicum  imperium  Mariam  domo  extrahit,  ut  prophetia  impleatur.  Locum  Deus  per  prophetam  designaverat  (ut  postea  videbimus),  ubi  filium  suum  nasci  vellet:  nisi  vi  compulsa  fuisset  Maria,  domi  parere  statuerat.  Iubet  Augustus  censum  agi  in  Iudaea,  et  singulos  nomen  dare,  ut  annuum  deinde  tributum  pendant,  quod  prius  solebant  Deo  pendere.  Ita  profanus  homo  ad  se  rapit,  quod  Deus  a  populo  suo  exigere  solebat.  Id  vero  perinde  erat,  ac  si  Iudaeos  prorsus  sibi  addicens  vetaret  posthac  in  Dei  populo  censeri.  Quum  ita  ad  ultimam  desperationem  ventum  est,  et  videntur  Iudaei  in  perpetuum  a  Dei  imperio  resecti  et  alienati  esse,  non  solum  Deus  repente  et  praeter  omnium  spem  remedium  adhibet,  sed  impia  illa  tyrannide  ad  redimendum  populum  suum  utitur.  Nam  praeses  (vel  quisquis  fuit  ille  Caesaris  minister),  dum  exsequitur,  quod  sibi  mandatum  est,  arcanus  est  Dei  praeco,  qui  Mariam  in  locum  divinitus  ordinatum  arcessat.  Et  certe  huc  spectat  tota  Lucae  narratio,  ut  agnoscant  fideles,  Christum  a  suis  natalibus  Dei  manu  productum  esse.  Neque  enim  ad  fidei  certitudinem  hoc  parum  facit,  quod  subito  et  praeter  suum  arbitrium  tracta  fuit  Maria  in  Bethlehem,  ut  inde  prodiret  redemptor,  sicuti  olim  promissus  erat.  1.  Totus  orbis.  Haec  synecdoche,  quum  passim  usitata  sit  Romanis  scriptoribus,  dura  videri  non  debet.  Nec  dubito,  quin  omnibus  provinciis  communis  fuerit  hic  census,  ut  magis  tolerabilis,  nec  tam  odiosus  foret:  diversa  tamen  esse  potuit  tributi  ratio.  Primam  fuisse  hanc  descriptionem  interpretor,  quia  tunc  Iudaeis  quasi  plane  domitis  impositum  fuit  novum  et  insolitum  iugum.  Nam  quod  alii  primam  fuisse  dicunt,  ex  quo  Cyrenius  Syriae  praefuerat,  nihil  habet  coloris.  Annuum  quidem  erat  tributum,  sed  non  quotannis  fiebat  descriptio:  quare  sensus  est,  longe  tunc  gravius  oppressos  fuisse  Iudaeos.  Varietas  in  nomine  proconsulis  nihil  habet  absurdi,  dum  alii  Cyrenium,  Quirinum  vel  Quirinium  appellant:  scimus  enim,  Graecos  in  vertendis  nominibus  Latinis  in  pronuntiatione  aliquid  fere  mutare.  Sed  longe  maior  aliunde  emergit  difficultas:  tradit  enim  Iosephus  libr.  Antiq.  18  cap.  1,  Quirinum,  relegato  Viennam  Archelao,  proconsulem  venisse,  qui  Iudaeam  provinciae  Syriae  attribueret.  Porro  inter  scriptores  convenit,  Arche-