7:704  Nec  vero  adeo  crassus  sum,  ut  spiritum  Dei  vel  in  panem  vel  in  aquam  opinione  mea  includam.  Sed  hac  obiectione  non  evincis,  sacramentum  non  esse  instrumentum  gratiae  conferendae.  Nam  et  vox  hominis  ad  salutem  administrandam  Dei  instrumentum  est,  quum  res  sit  mamma.  Sol  terram  vegetat,  tametsi  caret  ipse  vigore.  Panis,  qui  vitam  non  habet,  eam  tamen  nobis  suppeditat.  Nihilo  magis  sententiam  meam  oppugnat,  quod  continuo  post  addis,  per  spiritum  et  fidem  duntaxat  conferri  nobis  omnia  Christi  bona.  Quin  potius,  ut  iam  ante  tibi  memini  me  scripsisse,  inde,  quod  tu  improbas,  colligo,  per  sacramenta  quoque  conferri.  Nam  ideo  certe  per  fidem,  quia  per  verbum.  Atqui  nunquam  sacramentum  sine  verbo,  quum  et  ipsum  visibile  sit  verbum,  et  in  se  promissionem,  cuius  sigillum  est,  inclusam  habeat.  Fide  ergo  quum  percipi  concedas,  quae  fidem  generant  aut  confirmant  praeter  rationem  excludis.  Fateor  quidem,  ut  verbum,  ita  et  sacramentum,  absque  fide  nihil  prodesse.  Nec  sane  aliud  dico  quam  prodesse,  quatenus  est  fidei  adiumentum.  Nihil  hic,  quod  a  Paulina  doctrina  vel  minimum  discrepet,  reperies.  Quin  potius  hoc  idem  est  quod  ubique  docet.  Ad  VIII.  Quae  dicis  vera  sunt  omnia  et  cum  nostris  pulchre  congruunt.  Ad  IX.  Ideo  te  offendit  particula  SIMUL  quia  tempus  notare  putas.  Ego  autem  nihil  minus  volui  quam  gratiam  Dei  ad  tempus  illud  restringere  quo  sacramenta  percipimus.  Cuius  rei  vel  unus  libellus  contra  Anabaptistas  luculentus  erit  testis.  Gratia  Dei,  fateor,  non  in  Abraham  modo,  sed  in  Eunucho,  in  Cornelio,  in  aliis,  baptismum  praecessit.  Infantes  non  eodem  temporis  momento  spiritum  regenerationis,  quo  baptismum,  percipiunt.  Est  enim  illis  futurae  magis  gratiae  symbolum,  quam  praesentis,  hac  in  parte.  Itaque  particula  SIMUL  hic  mihi  nihil  aliud  significat  quam  similiter.  Atque  hic  sensus  est:  tam  vere  nos  fieri  compotes  rei  signatae,  quam  vere  signum  oculis  cernimus.  Obiicis,  Paulum  circumspectius  loquutum,  ubi  docet  nos  unum  esse  panem,  non  effici.  Atqui  non  minus,  opinor,  Rom.  sexto  (v.  4),  Gal.  tertio  (v.  27)  circumspecte  idem  pronunciat,  nos  sepultos  esse  per  baptismum  in  mortem  Christi,  et  quicunque  baptisati  sunt  Christum  induisse.  Itaque  vel  incogitantiae,  vel  temeritatis  damnare  nos  non  potes,  quin  Paulus  ipse  crimen  prius  sustineat.  Et  nos  hic  sophistis  aggregas  quasi  nostra  probent.  Ego  autem,  ut  tibi  gratulor,  cui  sophistae  adeo  sint  ignoti,  hic  te  rogatum  velim,  ne  ideo  scripta  mea  improbes  quod  sophistis  placeant.  Longe  enim  hac  in  re  falleris.