7:703  703  CONSENSIO  704  paribus  signis  eadem  loquutio  te  offendit?  Quid  quod  Paulus  tradit,  nos  per  baptismum  consepultos  esse  Christo  (Rom.  6,  4)?  Quod  in  sacramentis  nuda  signa,  praeterito  verbo,  consideras,  in  eo  abs  te  dissentio.  Panis  enim,  et  vinum,  et  aqua  in  sacramentis  eundem  habent  locum  quem  metalla  in  nummis.  Porro  forma,  non  materia,  nummum  facit.  Quanquam  in  sacramentis  ut  primas  tenet  spiritus  efficacia,  imo  sola  regnat,  ita  nunquam  omitti  debet,  ubi  de  illorum  fructu  agitur.  Quod  ad  loquutionem  pertinet,  Lucas  certe  virtutem  spiritus  sancti  communicare  externo  symbolo  voluit,  quum  spiritum  dari  scripsit  per  manuum  impositionem:  nec  Paulus  spiritui  sancto  vocis  suae  sonitum  opposuit,  quum  Galatas  diceret  (S,  2)  spiritum  ex  auditione  verbi  accepisse;  sed  instrumenta,  quibus  utitur  Deus,  secundarias  habere  in  agendo  partes  admonent.  Ad  V.  Nihil  est  quod  respondeam,  nisi  me  adeo  crassum  non  esse  ut  externum  caeremoniae  usum  cum  interiori  spiritus  gratia  confundam.  Ad  VI.  Ego  libenter  subscribo:  modo  ita  Dei  spiritum  per  se  nos  reddere  Christi  participes  dicas,  ut  sacramentis  inferiores  suae  vires  relinquantur.  Non  quod  seorsum  illis  a  spiritu  quidquam  velim  tribui:  sed  quia  eius  sunt  instrumenta,  ne  inania  et  nihili  censeantur.  Ad  VII.  Scio  innumeros  esse  pios  homines  quorum  conscientias  optime  sedavit  haec  doctrina:  tantum  abest  ut  inde  urantur.  Te  vero  cur  affligat,  nulla  est  causa.  Frustra  enim  times  ne  opus  salutis  nostrae  creaturis  potius  quam  Deo  adscribam.  Si  qui  vel  minimam  eius  partem  ad  creaturas  derivant,  ab  hac  suspicione,  ut  spero,  me  liberabunt,  quicunque  scripta  mea  legerint.  Unum  certe  me  ex  iis  esse  arbitror,  qui  illustrandae  Dei  gloriae  fidelem  operam  hoc  saeculo  impenderunt.  Vide  tamen  quale  sit  tuum  argumentum:  Deus  solus  agit;  cessant  igitur  instrumenta.  Quid?  annon  Paulus  qui  admonet  nihil  esse  totum  hominum  laborem  omnesque  conatus,  idem  se  profitetur  Dei  cooperarium?  Deus  ergo  solus  nos  regenerat,  sed  hominis  opera.  Hyperbolicae  similitudines,  quas  tu  adducis,  nihil  ad  me:  quia  illis  non  delector.  Ego  certe  consequentias  istas  non  admitto  :  Deus  per  baptismum  exhibet  quod  figurat;  ergo  baptismus  infundibulum  est  vel  canalis.  Ideo  enim  per  sacramentum  exhibere  dicitur  Deus  quod  figurat,  non  quia  illic  sit  inclusum,  sed  quia  spiritus  sui  virtute  nobis  praestet,  ne  fallax  vel  inanis  sit  figura.  Quod  obiicis,  non  esse  donorum  Dei  capax  signum  visibile,  quum  res  sit  inanima,  id  ego  tecum  fateor.