7:702  efficit,  per  sacramenta  quoque,  velut  instrumenta,  efficiat.  Spiritus  sanctus  est  σφραγὶς  quae  Dei  promissiones  in  cordibus  nostris  obsignat.  Eundem  titulum  Paulus  circumcisioni  tribuit  (Rom.  4,  11),  neque  tamen  quidquam  spiritui  derogat.  Nam  quae  subordinantur  non  pugnant.  Spiritus  autor  est,  sacramentum  vero  instrumentum  quo  utitur.  Quae  tu  adducis,  Paulus  de  sacramentis  praedicat.  Dicit  enim,  qui  vere  sunt  baptizati,  Christum  induisse  (Gal.  3,  27).  Dicimus  fideles  percipere  quod  in  sacramentis  offertur,  ne  videatur  Deus  in  suis  promissis  fallax.  Ad  III.  Nihil  respondeo,  quia  de  eo  satis  inter  nos  convenit.  Nam  si  in  creaturis  salutis  suae  fiduciam  locant  idololatrae,  ab  eo  scelere  scripta  mea,  ut  existimo,  abunde  me  vindicant.  Ad  IV.  Videndum  semper  est  ne  simus  in  repudiandis  loquendi  formis  nimium  morosi,  quae  nihil  falsum,  nihil  absonum  continent.  Cur  negemus  Deum  agere  per  sacramenta,  quum  testetur  Paulus  nos  salvos  esse  per  lavacrum  regenerationis  (Tit.  3,  5)?  Si  excipias,  de  spirituali  regeneratione  ipsum  loqui,  assentiar:  sed  ita  ut  signi  quoque  mentionem  faciat.  Signa  et  virtutes  factas  per  manus  apostolorum  Lucas  commemorat  (Act.  5,  12;  14,  3;  19,  11  ete).  Paulus  de  iis  quae  per  ipsum  effecerat  Dominus  gloriatur  (Rom.  15,  19;  2  Cor.  12,  12  ete).  Et  quid  magis  Deo  proprium  quam  nos  in  vitam  spiritualem  regignere?  Id  tamen  fieri  scriptura  docet  per  hominis  ministerium.  Imo  hoc  pie  sibi  arrogat  Paulus,  quod  genuerit  Corinthios  (1  Ep.  4,  15),  quia  se  non  effert  adversus  spiritum  Dei,  sed  tantum  eius  virtutem,  quae  se  in  eius  labore  patefecerat,  quasi  testem  sui  apostolatus  producit.  Ne  longior  sim  in  re  clara,  si  per  manuum  impositionem  datum  fuisse  spiritum  sanctum  Lucas  vere  praedicat  (Act.  8,  17),  cur  in