10.1:70  viris,  quorum  magna  multitudo  ad  hoc  spectaculum  convenerat,  gratias  egit,  et  doctores  cohortatus  ut  sui  quoque  officii  meminissent,  ac  demum  Deum  immortalem  precatus  ut  his  initiis  faveret,  coetum  dimisit.  Postridie  vero  publicae  privataeque  scholae  doctores  ad  suum  quisque  docendi  munus,  quod  felix  faustumque  sit,  accesserunt  Habentur  autem  omnino,  si  quis  academiae  leges  recte  expendat,  singulis  [pag.  10]  hebdomadibus  in  publica  quidem  schola  lectiones  XXVII.,  tres  nimirum  theologicae,  octo  hebraeae,  graecae  tres  in  ethicis,  quinque  in  graecis  oratoribus  vel  poetis,  tres  in  physicis  vel  mathematicis,  quinque  in  dialecticis  vel  rhetoricis.  In  privata  vero  schola,  quae  in  septem  classes  est  distributa,  lectiones,  absque  repetitionibus,  LXX.  singulis  hebdomadibus  habentur.  Quod  si,  ut  speramus  Dei  bonitate  freti,  idem  Deus  istorum  consiliorum  autor  ea  promoverit,  tum  de  istis  perficiendis  quae  sunt  inchoata,  tum  etiam  de  reliquis  adiiciendis,  puta  iuris  prudentiae  ac  medicinae  professione,  cogitatio  suscipietur.  [pag.  l  l  ]  DE  PRAECEPTORIBUS  GYMNASII.  Idonei  praeceptores  qui  in  singulis  classibus  doceant,  a  ministrorum  et  professorum  collegio  cum  bona  et  pura  conscientia  eliguntor.  Electi  amplissimo  Senatui  offeruntor,  et  eius  arbitratu  confirmantor.  Mature  in  suis  auditoriis  adsunto,  nec  temere  lectiones  praescriptas  omittunto.  Si  quae  idonea  causa  coegerit  lectiones  intermittere,  tempestive  ludimagistrum  admonento,  ut  studiosis  prospiciatur.  Prospicietur  autem  vel  reperto  vicario,  vel  duabus  propinquis  classibus  in  unam  ad  tempus  coniunctis.  Inter  docendum,  moderatam  gravitatem  tum  in  habitu  tum  in  gestu  servanto.  In  scriptores  quos  interpretabuntur,  ne  invehuntor,  sed  eorum  sententiam  fideliter  explicanto.  Si  quid  nimium  obscure,  aut  non  suo  loco,  aut  non  satis  diligenter  scriptum  videbitur,  auditores  modeste  admonento.  Pueros  in  silentio  continento.  Contumaces  aut  negligentes  arguunto,  et  pro  culpae  ratione  castiganto.  Praecipue  Deum  amare,  et  vitia  odisse  docento.  Non  nisi  peracta  lectione  (quoad  eius  fieri  poterit)  ex  auditorio  egrediuntor.  Dato  autem  signo,  statim  suos  quisque,  eo  quem  dicemus  ordine,  dimittunto.