6:7  LECTORIBUS.  8  utinam  non  paulo  post  sentiant  filii  nostri,  fuisse  hoc  verum  potius  vaticinium,  quam  coniecturam.  Quo  magis  elaborandum  nobis  est,  ut  qualescunque  ecclesiae  reliquias,  quae  post  mortem  nostram  restabunt,  vel  etiam  emergent,  scriptis  nostris  colligamus.  Et  alia  quidem  scriptorum  genera,  quis  noster  omnium  fuerit  in  religione  sensus,  ostendent:  sed  illustriore  documento,  quam  inter  se  habuerint  ecclesiae  nostrae  doctrinae  concordiam,  perspici  non  poterit,  quam  ex  catechismis.  Illic  enim  non  modo  quid  semel  docuerit  unus  homo,  aut  alter,  apparebit:  sed  quibus  a  pueritia  rudimentis  imbuti  perpetuo  fuerint  apud  nos  docti  simul  atque  indocti:  ut  haberent  hoc  omnes  fideles,  quasi  solenne  christianae  communionis  symbolum.  Atque  haec  sane  praecipua  mihi  fuit  edendi  huius  catechismi  ratio.  Valuit  tamen  non  parum  haec  1)  quoque  altera,  quod  eum  a  plurimis  desiderari  audiebam,  quia  lectu  non  indignum  fore  sperarent.  Iudicione  id  an  errore,  pronunciare  non  est  meum,  sed  eorum  tamen  voto  morem  gerere  aequum  fuit.  Quin  etiam  iniecta  mihi  propemodum  necessitas  erat,  ne  liceret  impune  detrectare.  Nam  quum  ante  annos  septem  edita  a  me  esset  brevis  religionis  summa  sub  catechismi  nomine,  verebar  nisi  hoc  in  medium  prolato  anteverterem,  ne  illa,  quod  nolebam,  rursum  excuderetur.  Bono  igitur  publico  si  vellem  consultum,  curare  me  oportuit,  ut  hic,  quem  ego  praeferebam,  locum  occuparet.  Praeterea  ad  exemplum  pertinere  arbitror,  re  ipsa  testatum  fieri  mundo,  nos  qui  ecclesiae  restitutionem  molimur,  ubique  in  hanc  partem  fideliter  incumbere,  ut  saltem  catechismi  usus  qui  aliquot  antehac  saeculis  sub  papatu  abolitus  fuit,  nunc  quasi  postliminio  redeat.  Nam  neque  satis  pro  sua  utilitate  commendari  potest  sanctum  hoc  institutum:  nec  papistis  satis  exprobrari  [fol.  6]  tam  flagitiosa  corruptela,  quod  illud  in  pueriles  vertendo  ineptias,  non  modo  sustulerunt  e  medio,  sed  eo  quoque  ad  impurae  et  impiae  superstitionis  praetextum  turpiter  sunt  abusi.  Adulterinam  enim  illam  confirmationem,  quam  in  eius  locum  subrogarunt,  instar  meretricis  magno  caeremoniarum  splendore  multisque  pomparum  fucis  sine  modo  ornant:  quin  etiam  dum  ornare  volunt,  exsecrandis  blasphemiis  adornant,  dum  sacramentum  esse  iactant  baptismo  dignius:  vocantque  semichristianos,  quicunque  foetido  suo  oleo  non  fuerint  infecti:  interim  vero  tota  eorum  actio  nihil  quam  histrionicas  gesticulationes  continet,  vel  potius  lascivos  simiarum  lusus,  absque  ulla  aemulationis  arte.  Vos  autem  fratres  mihi  in  Domino  carissimi,  quibus  ipsum  nuncuparem,  ideo  elegi,  quia  praeterquam  quod  me  amari  a  vobis,  et  plerosque  etiam  vestrum  scriptis  meis  delectari  nonnulli  ex  vestro  coetu  mihi  indicaverant,  id  quoque  nominatim  postularant  a  me  per  literas,  ut  hunc  laborem  sua  gratia  susciperem.  Alioqui  una  illa  satis  iusta  futura  erat  ratio,  quod  pridem  ex  piorum  et  gravium  virorum  relatu  ea  de  vobis  intellexi,  quae  animum  vobis  meum  penitus  obstringerent.  Nunc  vero,  quod  vos  sponte  facturos  confido,  peto  tamen  a  vobis  ut  hoc  benevolentiae  erga  vos  meae  testimonium  boni  velitis  consulere.  Valete.  Dominus  vos  sapientiae,  prudentiae,  zeli  et  fortitudinis  spiritu  in  dies  magis  ac  magis  augeat  in  ecclesiae  suae  aedificationem.  G-enevae.  4.  Calendas  Decembris.  1545.  1)  haec,  om.  Gall,  Beza  et  seqq.