55:7  7  ARGUMENTUM.  quoniam  reverentia,  quam  Mosi  deferebant,  obstare  poterat,  docet  Christum  longe  omnibus  praecellere.  Ac  postquam  summatim  attigit  quibus  nominibus  praecellat,  nominatim  angelos  illi  submittit,  ut  cum  illis  reliquos  omnes  cogat  in  ordinem.  Prudenter  autem  hac  ratione  progreditur:  nam  si  a  Mose  coepisset,  magis  odiosa  fuisset  comparatio.  Ubi  autem  ex  scripturis  constat,  coelestes  quoque  principatus  subsidere  infra  Christum  :  non  est  cur  recuset  Moses,  vel  ullus  quispiam  mortalium,  illis  aggregari:  ut  supra  omnes  tam  homines  quam  angelos  filius  Dei  emineat.  Itaque  postquam  angelos  apostolus  sub  Christi  dominium  et  potestatem  redegit,  mox  quasi  sumpta  fiducia,  quanto  inferior  sit  Moses,  pronuntiat:  nempe  quantum  differt  servus  a  domino.  Quod  ergo  tribus  primis  capitibus  Christum  in  summo  gradu  principatus  collocat,  huc  tendit,  ut  eo  loquente  omnes  sileant,  nec  quidquam  nos  impediat  quominus  eius  doctrinae  solidam  audientiam  praestemus.  Quam  quam  secundo  capite  eum  nobis  fratris  loco  in  carne  nostra  proponens,  hoc  modo  nos  allicit,  ut  libentius  nos  totos  illi  devoveamus  ac  tradamus.  Et  simul  exhortationes  minasque  admiscet,  si  quis  vel  ad  obsequendum  sit  tardior,  vel  contumaciter  repugnet:  idque  agit  prope  ad  finem  usque  quarti  capitis.  Inde  transit  ad  explicandum  Christi  sacerdotium:  cuius  vera  et  pura  cognitio  omnes  legis  caeremonias  abolet.  Sed  ubi  breviter  tantum  indicavit  quam  debeat  nobis  illud  esse  amabile,  et  quam  suaviter  acquiescere  in  eo  liceat,  paulisper  ad  increpandos  Iudaeos  digreditur,  eo  quod  in  primis  elementis,  tanquam  pueri,  haesitarent,  ubi  etiam  gravi  et  severa  denuntiatione  eos  terret.  Periculum  enim  esse  ne  si  ad  proficiendum  adeo  sint  segnes,  tandem  abiiciantur  a  Domino.  Verum  hanc  asperitatem  mox  temperat,  quum  dicit  meliora  se  sperare:  ut  eorum  potius  animos  erigat  ad  studium  profectus  quam  deiiciat.  Postea  ad  sacerdotii  tractationem  redit:  in  qua  docet  primo,  differre  ipsum  a  veteri  sacerdotio  quod  sub  lege  fuit,  deinde  esse  praestantius,  quod  in  eius  locum  succedat,  et  iureiurando  sanciatur;  quod  aeternum  sit,  semperque  vigeat: