43:7  7  IN  AMOS  8  eadem,  vel  similia:  quomodo  credibile  est  mala  haec  vel  calamitates  profluxisse  ex  vindicta  Dei,  quum  et  Idumaei,  et  Moabitae,  et  Ammonitae,  et  Tyrii,  et  Sidonii  etiam  nobiscum  impliciti  sint  communibus  malis?  Nam  si  Dei  manus  nos  persequitur,  idem  valere  debet  etiam  in  ipsis.  Si  fortuna  dominium  suum  caeco  impetu  exercet  contra  Moabitas  et  Idumaeos,  et  Tyrios,  certe  idem  etiam  de  nobis  sentiendum  est.  Concidisset  igitur  omnis  autoritas  prophetae,  nisi  sensissent  Israelitae  Deum  fore  iudicem  omnium  gentium.  Nam  simul  etiam  tenendum  est,  vastatum  fuisse  regnum  Israel  cum  aliis  regionibus  vicinis.  Bellum  enim  sparsum  fuit  longe  et  late.  Nam  Assyrius  fuit  violenta  quaedam  tempestas,  quae  exundavit  per  totam  illam  mundi  plagam.  Non  soli  igitur  Israelitae  tunc  rebus  adversis  fuerunt  afflicti,  sed  omnes  gentes,  de  quibus  vaticinia  subiiciet  Amos.  Ergo  necesse  fuit  hunc  catalogum  referri,  quem  videbimus,  ut  Israelitae  totidem  haberent  confirmationes  vindictae  Dei,  quot  spectacula  eorum  oculis  obversata  sunt,  quum  scilicet  viderent  diras  afflictiones  ubique  grassari.  Hoc  tenendum  est.  Deinde  aliud  etiam  spectavit  propheta:  nam  si  Idumaei,  et  Moabitae,  et  Tyrii,  et  Ammonitae,  tam  duriter  fuissent  tractati,  et  non  fuisset  haec  coniunctio  facta  a  propheta,  putassent  se  eximi  a  communibus  poenis,  quia  Deus  esset  illis  propitius:  sicuti  hypocritae  semper  sese  magis  obdurant  quantisper  Deus  ille  parcit:  Ecce  puniuntur  Ammonitae,  et  Moabitae,  trahuntur  in  supplicium  Idumaei,  et  Tyrii,  et  reliquae  gentes.  Deus  ergo  illis  omnibus  est  infensus:  sed  nos  sumus  eius  filii,  quia  sic  nobis  indulget.  Propheta  autem  hic  involvit  in  unum  fasciculum  Israelitas  cum  Moabitis,  et  Idumaeis,  et  reliquis  profanis  gentibus:  ac  si  diceret,  Non  parcet  Deus  vicinis  vestris:  sed  ne  putetis  vos  immunes  fore  ab  eius  vindicta,  quum  illi  rapientur  ad  poenam  :  denuntio  vobis  Deum  fore  omnium  iudicem  simul.  Nunc  tenemus  consilium  prophetae.  Ergo  voluit  hic  ante  oculos  ponere  Israelitis  aliorum  poenas,  ut  hoc  modo  expergefierent,  ac  postea  descenderent  in  se  ipsos.  Videmus  enim  saepe  hoc  contingere,  ut  qui  intractabiles  sunt  ac  praefracto  ingenio,  si  ad  eos  sermo  dirigitur,  non  admodum  sint  attenti.  Si  autem  audiant  aliorum  peccata,  deinde  etiamsi  audiant  aliquid  de  poenis,  illic  advertunt  animum.  Voluit  igitur  propheta  sensim  adducere  Israelitas  ad  docilitatem,  quia  sciebat  ipsos  torpere  in  suis  delitiis:  deinde  excaecatos  esse  superbia,  ut  non  tam  facile  possent  subire  iugum  :  ideo  proposuit  illis  poenas,  quae  vicinis  populis  instabant.  Quanquam  notandum  est  aliam  fuisse  rationem.  Non  reiicio  quas  hactenus  recensui:  sed  dico  praeterea  hoc  prophetam  spectasse,  nempe  Deum  sumpturum  esse  poenas  de  Syriis,  quia  crudeliter  saevierunt  adversus  Israelitas,  et  praesertim