42:7  7  SERMON  XXXIV.  8  Puisqu'ainsi  est  donc  que  iusques  aux  petits  enfans  le  iugement  de  Dieu  s'execute,  il  faut  que  nous  ouvrions  les  yeux  pour  le  contempler,  que  nous  ne  soions  point  aveugles,  car  Dieu  ne  nous  veut  point  seulement  ici  monstrer  ces  histoires  pour  dire,  cela  est  advenu,  mais  il  parle  comme  iuge  du  monde.  Voila  donc  quant  a  la  maison  d'Alexandre  le  grand:  le  semblable  se  peut  voir  au  royaume  de  Macedone,  voila  le  royaume  de  Macedone  qui  est  grand  et  puissant  sur  tous  les  autres,  qu'il  semble  qu'il  vueille  retenir  le  nom  d'Alexandre  et  relever  sa  memoire  pour  dire,  nous  sommes  de  cette  nation  excellente,  qu'ils  se  glorifient  en  cela  iusques  au  bout,  mais  cependant  Dieu  trouve  bien  le  moien  pour  les  defaire  et  pour  les  humilier,  car  les  grands  saccagemens  ont  este  la.  Il  est  vray  qu'il  s'est  donne  beaucoup  de  combats  entre  les  capitaines  d'Alexandre  le  grand  (comme  il  ha  este  dit).  Mais  c'a  este  au  pays  de  Macedone,  comme  si  Dieu  eust  desploie  la  sa  main  armee,  et  qu'il  eust  voulu  monstrer  combien  luy  desplaist  toute  cruaute  et  l'a  en  execration.  Ceste  grandeur  donc  de  Macedone  est  bien  abatue,  il  y  ha  Antipater  qui  y  domine,  mais  puis  apres  il  change,  qu'il  faut  qu'il  s'en  alle  apres  avoir  commis  beaucoup  de  meurtres.  Alors  Cassander  son  fils  succede:  celuy-la,  est  il  trepasse?  Il  laisse  deux  enfans,  l'un  tue  sa  mere  de  sa  propre  main  pource  qu'il  luy  sembloit  qu'elle  avoit  mieux  aime  son  frere  que  luy,  ils  se  combatent  par  ensemble,  et  quand  ils  se  veullent  reconcilier,  l'un  est  tue,  comme  s'il  avoit  trahi  celuy  qu'il  avoit  appele  en  son  aide,  et  puis  l'autre  est  destitue.  Cela  fait  il  survient  tant  de  roys  nouveaux,  l'un  apres  l'autre  que  c'est  une  confusion,  l'un  y  est  demain,  l'autre  seulement  deux  mois.  Or  nous  scavons  que  la  ou  il  se  fait  ainsi  guerre  continuelle,  qu'il  s'y  fait  un  degast  terrible,  nous  scavons  qu'il  faut  qu'un  chacun  en  ait  les  espaules  bien  chargees,  quand  il  se  fait  tant  de  mutations  et  de  changements,  que  cela  ne  peut  avenir  sans  grande  effusion  de  sang,  nous  scavons  ce  que  la  guerre  apporte,  et  ce  n'est  pas  seulement  pour  une  guerre,  ni  deux  ni  trois,  mais  ce  pays  de  Macedone  est  constitue  comme  un  theatre,  a  fin  que  Dieu  monstre  la  comme  en  ce  monde  il  y  ha  une  mer  bouiliante,  et  qu'il  faut  que  les  choses  se  remuent.  Voila  donc  le  pays  de  Macedone  qui  est  constitue  a  cela,  et  ainsi  n'y  pouvons  nous  pas  contempler  un  iugement  de  Dieu  si  certain,  que  nous  soions  contraints  de  dire,  voila  Dieu  qui  fait  office  de  iuge.  Voila  donc  le  second  que  nous  avons  a  noter,  quant  au  pays  de  Macedone.  Or  quant  aux  capitaines  d'Alexandre  le  grand,  c'estoient  comme  une  bende  de  bestes  sauvages,  qui  estoient  venus  pour  manger  et  pour  engloutir  tout  le  monde,  comme  les  bestes  iront