9:696  X.  Tout  nostre  bien  en  la  grace  de  Dieu.  Et  afin  que  toute  gloire  et  louenge  soit  rendue  a  Dieu  (comme  elle  est  deue)  et  que  nous  puissions  avoir  vraye  paix  et  repos  en  nos  consciences,  nous  entendons  et  confessons  que  nous  recevons  tous  les  benefices  de  Dieu  cy  dessus  recitez  par  sa  seulle  clemence  et  misericorde,  sans  aulcune  consideration  de  nostre  dignite  ou  merite  de  nos  oeuvres,  auxquelles  n'est  deue  aulcune  retribution  que  de  confusion  eternelle.  Neantmoins  que  nostre  Seigneur  par  sa  bonte  nous  ayant  receu  en  la  communion  de  son  fils  Iesus  a  les  oeuvres  que  nous  faisons  en  foy  plaisantes  et  agreables:  non  point  qu'elles  le  meritent,  mais  pourtant  que,  ne  nous  imputant  point  l'imperfection  qui  y  est,  il  ne  recognoist  en  icelles  synon  ce  qui  procede  de  son  esprit.  XI.  Foy.  Nous  confessons  que  l'entree  que  nous  avons  a  si  grans  thresors  et  si  grandes  richesses  de  la  bonte  de  Dieu,  qui  est  espandue  sur  nous,  c'est  par  la  foy:  quant  en  certaine  confiance  et  certitude  de  cueur,  nous  croyons  aux  promesses  de  l'Evangile  et  recevons  Iesuchrist  tel  qu'il  nous  est  presente  du  Pere  et  qu'il  nous  est  descript  par  la  Parolle  de  Dieu.  XII.  Invocation  de  Dieu  seul  et  intercession  de  Christ.  Comme  nous  avons  declaire  ne  avoir  la  confiance  et  esperance  de  nostre  salut  et  tout  bien  en  aultre  que  en  Dieu  par  Iesuchrist,  aussi  nous  confessons  que  nous  le  debvons  invoquer  en  toutes  nos  recessitez  au  nom  de  Iesuchrist  qui  est  nostre  mediateur  et  advocat  par  lequel  avons  acces  a  luy.  Pareillement  debvons  recognoistre  que  tous  biens  viennent  de  luy  seul,  et  luy  en  rendre  actions  de  graces.  Au  contraire  nous  reiectons  l'intercession  des  Saincts,  comme  une  superstition  inventee  des  hommes  contre  l'Escripture,  vu  mesmes  qu'elle  ne  procede  que  de  deffiance  que  l'intercession  de  Iesuchrist  ne  soit  suffisante.  XIII.  Oraison  intelligible.  Davantaige  puis  que  oraison  n'est  synon  hypocrisie  et  faintise,  si  elle  ne  procede  de  l'affection  interieure  du  cueur,  nous  entendons  que  toutes  oraisons  se  doibvent  faire  en  certaine  intelligence.  Et  pour  ceste  cause  nous  apprenons  l'Oraison  de  nostre  Seigneur,  pour  bien  entendre  ce  que  nous  debvons  luy  demander:  Nostre  Pere  qui  es  es  cieulx  mais  delivre  nous  du  maling.  Amen.