23:696  patron  de  toutes  vertus  Angeliques,  en  chastete  [pag.  124],  en  patience,  en  obeissance  de  Dieu,  en  piete,  brief  s'estant  despouille  de  toutes  affections  pour  se  conformer  pleinement  a  la  iustice  de  Dieu.  Ayant  fait  tout  cela  neantmoins  n'a-il  rien  encores  pour  se  glorifier  (dit  sainct  Paul),  il  faut  qu'il  ait  la  bouche  close,  iusques  a  ce  que  par  la  foy  il  soit  iustifie,  ainsi  donc  nous  voyons  que  par  la  circonstance  du  temps  la  iustice  de  la  foy  de  laquelle  nous  parlons,  n'est  pas  telle  que  les  Papistes  imaginent.  Mais  c'est  autant  comme  si  l'Escriture  disoit,  cependant  que  nous  sommes  povres  pecheurs  redevables  a  Dieu  et  estans  sous  condamnations  de  mort  eternelle:  il  faut  donc  qu'il  nous  accepte  d'un  autre  moyen,  c'est  n'examinant  point  quels  nous  sommes,  ne  cerchans  point  en  nous  dequoy  nous  approuver,  mais  nous  tenant  pour  iustes,  d'autant  qu'il  luy  plait,  ou  pour  ce  que  nous  sommes  appuyez  sur  ses  promesses  par  lesquelles  il  nous  a  prevenus.  Voila  donc  la  iustice  qui  dure,  qui  a  son  estendue  et  son  cours  en  la  vie  et  en  la  mort.  Or  maintenant  nous  avons  a  deduire  les  choses  plus  au  long.  Et  en  premier  lieu  il  nous  doit  souvenir  de  ce  que  i'ay  naguieres  touche,  c'est  qu'il  nous  faut  aller  cercher  nostre  iustice  ailleurs  que.  en  nous,  d'autant  que  nous  en  sommes  tous  desnuez.  Et  voila  pourquoy  sainct  Paul  insiste  tant  [pag.  125]  sur  la  malediction  du  genre  humain  quand  il  nous  veut  amener  a  cest  article,  c'est  que  Dieu  nous  iustifie  gratuitement:  car  il  monstre  mesmes  que  les  Payens  sont  damnez  encores  qu'ils  n'ayent  nulle  Loy,  ni  Escritures,  ni  Prophetes,  desia  les  voila  condamnez  en  eux  mesmes  et  ne  faut  par  aller  plus  loing,  dit-il.  Oar  Dieu  se  manifeste  a  tous  en  general,  quand  il  nous  a  donne  des  yeux  pour  contempler  ses  vertus  en  la  creation  du  monde.  Or  nous  voyons  que  les  hommes  suffoquent  et  suppriment  ceste  gloire  qui  leur  devroit  estre  toute  patente.  Il  faut  donc  conclure  que  les  voila  tous  ingrats  voire  sacrileges,  d'autant  qu'ils  desrobent  a  Dieu  l'honneur  qui  luy  appartient.  Quant  a  ceux,  qui  sont  sous  la  Loy  ils  sont  condamnez  au  double,  car  ils  pechent  a  leur  escient  cognoissans  la  volonte  de  Dieu,  qui  leur  est  plainement  manifestee.  Ainsi  donc  voila  tout  le  genre  humain  enclos  sous  la  malediction.  Toute  bouche  est  fermee  dit-il,  et  n'y  peut  avoir  aucune  replique:  la  dessus  il  allegue  tant  de  passages  de  l'Escriture  pour  monstrer  que  Dieu  a  regarde  a  tous  hommes,  et  qu'il  n'en  a  pas  trouve  un  seul  bon,  qu'il  n'y  a  que  pourriture  en  eux,  c'est  a  dire,  qu'ils  sont  tellement  confis  en  leurs  iniquitez,  qu'ils  doivent  estre  tenus  pour  detestables.  Voila  donc  ce  que  nous  [pag.  126]  avons  a  noter  en  premier  lieu,  c'est  de  cognoistre  quelle  est  nostre  condition  iusques  a  ce  que  Dieu  viene  a  nous,  qu'il  nous  recoive  a  merci,  et  qu'il  nous  cerche  du  temps