9:695  695  CONFESSIONES.  696  VI.  Salut  en  Iesus.  Nous  confessons  doncques  que  Iesuchrist  est  celuy  qui  nous  a  este  donne  du  Pere  afin  qu'en  luy  nous  recouvrions  tout  ce  qui  nous  default  en  nous  mesmes.  Or  tout  ce  que  Iesuchrist  a  faict  et  souffert  pour  nostre  redemption,  nous  le  tenons  veritable  sans  aulcun  doubte,  ainsi  qu'il  est  contenu  au  Symbole,  qui  est  recite  en  l'Eglise,  c'est  assavoir:  Ie  croy  en  Dieu  le  Pere  tout  puissant  etc.  vil.  Iustice  en  Iesus.  Pourtant  nous  recognoissons  les  choses  qui  s'ensuyvent  nous  estre  donnees  de  Dieu  en  Iesuchrist:  Premierement  que  estant  de  nostre  nature  ennemys  de  Dieu,  subiects  a  son  ire  et  iugement,  nous  sommes  reconciliez  avec  luy  et  remis  en  sa  grace  par  l'intercession  de  Iesuchrist,  d'aultant  que  en  sa  iustice  et  innocence  nous  avons  remission  de  nos  iniquitez  et  que  par  l'effusion  de  son  sang  nous  sommes  purgez  et  nectoiez  de  toutes  nos  macules.  vill.  Regeneration  en  Iesus.  Secondement  que  par  son  Esprit  nous  sommes  regenerez  en  nouvelle  nature  spirituelle.  C'est  a  dire  que  les  concupiscences  maulvaises  de  nostre  chair  par  sa  grace  sont  mortifiees  afin  de  ne  plus  regner  en  nous.  Et  au  contraire  nostre  volunte  est  rendue  conforme  a  celle  de  Dieu  pour  suivre  sa  voye  et  chercher  ce  qui  luy  est  agreable.  Et  pourtant  que  par  luy  nous  sommes  delivrez  de  la  servitude  de  peche,  soubs  la  puissance  duquel  nous  sommes  de  nous  mesmes  tenus  captifs,  et  que  par  icelle  delivrance  nous  sommes  faicts  capables  et  ydoines  a  faire  bonnes  oeuvres  et  non  aultrement.  IX.  Remission  des  pechez  tousiours  necessaire  aux  fideles.  Finablement  que  ceste  regeneration  est  tellement  faicte  en  nous  que  iusques  a  ce  que  nous  sommes  despouilliez  de  ce  corps  mortel  il  y  demeure  tousiours  en  nous  beaucoup  d'imperfection  et  d'infirmitez:  tellement  que  nous  sommes  tousiours  pauvres  et  miserables  pecheurs  devant  la  face  de  Dieu.  Et  combien  que  nous  debvions  de  iour  en  iour  croistre  et  proffiter  en  la  iustice  de  Dieu,  toutesfois  il  n'y  a  iamais  plenitude  ne  perfection  cependant  que  nous  conversons  ici.  Par  quoy  nous  avons  tousiours  besoing  de  la  misericorde  de  Dieu  pour  obtenir  remission  de  nos  faultes  et  offenses.  Et  ainsy  debvons  nous  tousiours  chercher  nostre  iustice  en  Iesuchrist  et  non  point  en  nous,  et  en  luy  nous  reposer  et  asseurer,  ne  rien  attribuant  a  nos  oeuvres.