50:69  69  CAPUT  Y.  70  tota,  quam  in  ipso  habere  nos  convenit,  fiducia  et  consolatio.  Verum  hominem  et  fratrem  nostrum  agnoscimus  Christum  in  carne  sua,  non  carnaliter:  quia  nonnisi  in  consideratione  spiritualium  eius  donorum  acquiescimus.  Ipse  ergo  nobis  spiritualis  est,  non  quia  deposito  corpore  conversus  sit  in  spiritum:  sed  quia  suos  regeneret  ac  gubernet  spiritus  sui  virtute.  17.  Proinde  si  quis  in  Christo.  Quoniam  defectiva  est  oratio,  ita  implenda  est:  Si  quis  in  Christo,  hoc  est,  in  regno  Christi,  vel  in  ecclesia  locum  aliquem  obtinere  cupit:  ille  sit  nova  creatura.  Hoc  verbo  damnat  quamvis  excellentiam,  quae  magni  fieri  solet  ab  hominibus,  si  desit  renovatio  cordis.  Doctrina  quidem,  et  eloquentia,  et  reliquae  dotes  pretiosae  sunt  et  honorandae:  sed  ubi  non  adest  timor  Domini  et  recta  conscientia,  totus  earum  honor  evanescit.  Nemo  igitur  superbiat  ulla  excellentia:  quoniam  praecipua  laus  Christianorum  est  sui  abnegatio.  Neque  vero  hoc  tantum  dicitur  ad  refutandam  pseudoapostolorum  vanitatem,  sed  etiam  ad  corrigenda  ambitiosa  Corinthiorum  iudicia,  quibus  pluris  erant  externae  larvae  quam  vera  sinceritas.  Tametsi  hoc  commune  est  vitium  fere  omnibus  sacculis.  Quotus  enim  quisque  est,  qui  non  ostentationi  multo  plus  tribuat  quam  verae  sanctimoniae?  Ergo  hanc  admonitionem  teneamus,  nihil  esse  in  ecclesia  debere  omnes,  qui  non  renovati  sunt  Dei  spiritu:  quibuslibet  alioqui  ornamentis  fulgeant.  Vetera  praeterierunt.  Quum  de  regno  Christi  loquuntur  prophetae,  coelum  novum  et  terram  novam  fore  denuntiant.  Quo  significant  omnia  in  melius  conversum  iri,  donec  compleatur  piorum  felicitas.  Iam  vero  quum  spirituale  sit  Christi  regnum,  conversio  haec  potissimum  in  spiritu  fieri  debet:  ideoque  merito  inde  incipit.  Est  igitur  elegans  et  apta  allusio,  quum  Paulus  eiusmodi  elogium  ad  extollendam  regenerationem  accommodat.  Vetera  autem  appellat,  quae  non  sunt  spiritu  Dei  reformata.  Proinde  hoc  nomen  gratiae  renovationis  opponitur.  Transiisse  accipit  pro  emarcuisse:  ut  solent  res  caducae  post  elapsum  suum  tempus  decidere.  Solus  ergo  novus  homo  floret  ac  viget  in  regno  Christi.  18.  Porro  omnia  ex  Deo,  qui  nos  reconciliavit  sibi  per  Iesum  Christum:  et  dedit  nobis  ministerium  reconciliationis.  19.  Quoniam  erat  Deus  in  Christo  mundum  reconcilians  sibi,  non  imputando  illis  sua  ipsorum  peccata:  et  deposuit  in  nobis  sermonem  reconciliationis.  20.  Itaque  pro  Christo  legatione  fungimur,  tanquam  Deo  exhortante  per  nos:  %rogamus  pro  Christo,  reconciliemini  Deo.  21.  Eum  qui  peccatum  non  noverat,  pro  nobis  peccatum  fecit,  ut  nos  efficeremur  iustitia  Dei  in  ipso.