40:69  69  IN  EZECHIELIS  PROPH.  CAP.  II.  70  inter  ipsos.  Hic  rursus  hortatur  Deus  servum  suum  ad  perseverantiam,  qualiscunque  sit  eventus  laboris.  Nam  si  ex  animi  sententia  non  succedit,  proclives  sumus  ad  desperationem.  Deus  autem  vult  nos  pergere  in  officii  nostri  cursu,  etiam  si  infeliciter  omnia  cedant.  Caeterum  ostendit  aliquem  fore  laboris  fructum,  utcunque  populus  pro  sua  pravitate  reiiciat  quidquid  dictum  fuerit.  Nam  haec  cogitatio  frangit  animos  servorum  Dei,  ubi  nullam  cernunt  utilitatem  sui  laboris.  Semper  enim  cupimus  facere  aliquod  operae  pretium.  Deus  ergo  hic  significat  alium  esse  doctrinae  fructum,  quam  ut  hominibus  salutem  adferat:  nempe  quia  hoc  modo  tollitur  omnis  praetextus  erroris,  et  detegitur  eorum  impietas,  qui  libenter  integumenta  captarent.  Hypocritae  enim  etiam  si  volentes  et  scientes  pereant,  tamen  existimant  se  excusabiles,  nisi  Deus  lucem  doctrinae  suae  opponat.  Summa  igitur  est,  quamvis  non  prosit  Israelitis  doctrina  prophetae,  fore  tamen  utilem  alio  modo,  nempe  quia  sentient  tandem  fuisse  apud  eos  prophetam.  Hoc  modo  nullus  est  defectus,  quemadmodum  quidam  existimant  abruptum  esse  sermonem  prophetae.  Videtur  enim  deesse  principale  verbum,  ubi  dicit  ipsi  si  audierint,  et  si  destiterint:  quia  domus  rebellionis  ipsi,  et  cognoscent  quod  fuerit.  Diximus  enim  copulam  debere  in  adversativam  resolvi,  quod  tunc  tamen  cognoscent:  nec  efficient  sua  pervicacia,  quin  Deus  ipsos  convictos  teneat.  Discamus  autem  ex  hoc  loco,  quamvis  impii  furiose  conentur  respuere  doctrinam  Dei,  ipsos  tamen  nihil  aliud  consequi,  nisi  ut  suam  malitiam  magis  ac  magis  prodant.  Et  hinc  etiam  discamus  pretiosam  esse  Deo  suam  doctrinam,  nec  ferre  posse  ut  a  nobis  spernatur.  Contemptus  ergo  coelestis  doctrinae  nunquam  impune  cedet  improbis:  quia  perinde  est  ac  si  pedibus  calcarent  inaestimabilem  thesaurum.  Qui  destituuntur  lege  et  prophetis  non  tamen  effugient  Dei  manum,  quia  sufficit  illis  conscientia  ad  tollendam  excusationem.  Sed  ubi  Deus  homines  ad  se  invitat,  et  propius  ad  ipsos  accedit,  et  peculiari  modo  se  ipsum  offert  illis  in  patrem  et  doctorem:  si  respuant  tam  praeclarum  beneficium,  certe  eorum  ingratitudo  ultima  severitate  digna  est.  Quoties  ergo  Deus  excitat  nobis  prophetas,  et  fideles  doctrinae  suae  ministros,  veniat  nobis  in  mentem  quod  hic  dicitur:  *  nisi  amplectamur  tale  beneficium,  nos  tandem  cognituros  fuisse  nobis  prophetam,  quia  Deus  horribilem  vindictam  exiget  de  contemptu  tantae  suae  humanitatis.  Nunc  sequitur,  6.  Et  tu,  fili  hominis,  ne  timeas  ab  illis,  et  a  sermonibus  eorum  ne  timeas,  quia  rebelles  sunt  (est  quidem  aliud  verbum  quam  QHTID  :  sed  vertunt  rebelles:  forte  aliud  significat  quia  non  est  in  communi  usu  apud  Hebraeos),  et  spinae  tecum  (erga  te)  et  cum  scorpionibus  tu  habitas:  a  sermonibus  eorum