27:69  69  SUR  LE  DEUTER.  CHAP.  X.  70  avons  a  retenir  de  ce  passage.  Et  en  somme  notons  que  Moyse  nous  a  ici  voulu  recommander  l'equite,  et  droicture:  il  nous  monstre  (di-ie)  comme  nostre  Seigneur  veut  estre  servi  de  nous:  c'est  que  nous  cheminions  simplement  avec  nos  prochains,  n'attentant  nulle  violence,  ne  faisant  tort  ni  dommage  a  personne,  et  sur  tout  a  ceux  qui  sont  debiles,  et  qui  ne  sont  point  supportez  des  hommes.  Dieu  donc  ne  veut  point  estre  servi  et  honore  de  nous  par  ceremonies:  mais  il  faut  que  nous  ayons  iustice,  et  droicture  en  nous,  que  nous  rendions  equite  a  nos  prochains.  Voila  quels  sont  les  vrais  services,  comme  tant  de  fois  il  nous  est  monstre  en  l'Escriture.  Et  voila  aussi  dont  les  Prophetes  ont  puise  ces  sentences,  ou  ils  disent  que  Dieu  demande  misericorde,  et  non  point  sacrifice:  que  Dieu  veut  qu'on  chemine  avec  ses  prochains  sans  mal  faire  a  personne,  que  toutes  violences  cessent,  toutes  cruautez,  toutes  fraudes  soyent  loin  de  nous.  Les  Prophetes  ont  beaucoup  de  telles  exhortations:  la  source  dont  ils  les  ont  tirees,  est  ceste  doctrine  de  Moyse,  c'est  assavoir  que  Dieu  ne  veut  point  estre  servi  par  ie  ne  say  quelles  superstitions.  Comme  les  hommes  feront  beaucoup  de  pompes,  et  de  fanfares  pour  servir  a  Dieu,  en  beaux  temples,  en  belles  peinctures,  en  belles  tapisseries,  en  perfums,  en  cloches,  en  luminaire,  et  en  tout  ce  menu  bagage  :  il  leur  semble  que  Dieu  s'en  esiouit,  et  quand  ils  sonnent  des  orgues,  qu'ils  le  feront  dancer  comme  s'il  estoit  un  petit  enfant.  Or  ne  nous  amusons  point  a  tous  ces  menus  bagages  la:  car  Dieu  veut  estre  servi  en  verite,  en  droicture,  et  en  rondeur  de  coeur.  Et  puis  employons-nous  de  servir  a  nos  prochains:  car  il  n'a  que  faire  de  ce  que  nous  luy  pouvons  apporter:  mais  il  veut  que  nous  communiquions  ensemble,  qu'un  chacun  selon  sa  faculte  advise  de  secourir  a  ceux  qui  ont  faute  d'aide:  et  sur  tout,  bien  de  ne  nous  point  donner  licence  de  faire  nuisance,  ne  dommage  a  nul  qui  soit.  Voila  donc  le  moyen  de  servir  a  nostre  Dieu  tel  qu'il  veut,  afin  que  nous  ne  le  transfigurions  point  par  nos  vaines  follies,  en  nous  faisant  accroire  qu'il  sera  bien  honore,  quand  nous  luy  aurons  apporte  de  nos  menus  bagages,  comme  pour  luy  esblouyr  les  yeux:  cela  ne  se  peut  faire.  Or  apres  que  Moyse  a  declaire  que  Dieu  est  terrible,  et  qu'il  ne-  se  faut  point  iouer  a  un  si  grand  maistre,  et  qu'il  saura  bien  nous  rembarrer  si  nous  luy  voulons  estre  rebelles,  qu'il  nous  faut  cheminer  en  equite,  avoir  pitie  des  povres  gens,  secourir  ceux  qui  sont  oppressez,  n'exercer  nulle  cruaute,  ni  tyrannie  sur  les  foibles,  et  ceux  qui  sont  desnuez  de  support.  Apres  tout  cela  il  adiouste:  Que  Dieu  est  la  louange  de  son  peuple.  Et  c'est  afin  de  gagner  leurs  coeurs  par  douceur  et  par  amitie.  Et  en  ceci  voyons-nous  que  Dieu  n'oublie  rien  pour  nous  at-