26:69  69  SUR  LE  DEUTER.  CHAP.  III.  70  l'autre.  Celuy  qui  sera  le  plus  fin  et  le  plus  ruse,  sera  le  plus  habile  homme:  et  cela  est  comme  repute  a  vertu.  Et  pourquoy?  Car  chacun  s'esgare  en  ses  appetis  et  cupiditez,  voire,  tellement  que  ce  sont  autant  de  bandeaux  qui  nous  empeschent  de  regarder  a  Dieu.  Et  si  nous  n'y  pensons  auiourd'huy  :  si  est-ce  que  Dieu  n'oubliera  point  toutes  les  fraudes  et  malices,  les  trahisons  et  faussetez  qui  se  commettent  entre  les  hommes.  Car  il  a  prononce  que  s'il  y  ha  serment  qui  soit  entrevenu,  la  gloire  est  violee  d'autant:  et  on  se  mocque  pleinement  de  luy,  quand  on  fausse  sa  promesse.  Advisons  donc  qu'il  ne  portera  point  une  telle  iniure:  et  combien  que  nous  soyons  aveuglez  tant  et  plus,  qu'il  ne  fera  point  du  borgne  de  son  coste,  qu'il  ne  note  et  marque  tout  pour  le  faire  venir  en  conte.  Voila  ce  que  nous  avons  a  noter  pour  un  item.  Cependant  nous  voyons,  qu'il  n'y  ha  que  ceux  qui  font  des  contracts  licites,  qui  les  puissent  faire  comme  devant  Dieu.  Car  tous  les  meschans  qui  complottent,  voire  pour  s'aider  les  uns  les  autres  en  mal,  pour  renverser  toute  iustice,  pour  faire  des  traffiques  meschantes,  pour  machiner  des  violences,  pour  opprimer  cestuy-ci,  et  cestuy-la,  pour  se  maintenir  en  leurs  iniquitez:  tous  ceux  donc  qui  conspirent  ainsi,  il  faut  qu'ils  cerchent  comme  des  cachettes:  ils  n'ont  garde  de  se  monstrer  a  Dieu,  ni  cheminer  en  sa  presence:  mais  il  faut  qu'ils  le  retirent  plustost  de  luy:  non  pas  qu'ils  le  puissent  faire.  Mais  tant  j  a  que  les  meschans  s'endorment,  quand  ils  font  ainsi  leurs  complots  villains  et  detestables:  il  faut  qu'ils  se  tiennent  la  comme  en  tenebres,  et  qu'ils  fuyent  la  presence  de  Dieu  tant  qu'ils  pourront.  D'autant  plus  nous  faut-il  souvenir  de  ce  passage,  qu'en  toutes  nos  promesses,  en  toutes  nos  affaires  nous  y  allions  comme  devant  Dieu:  que  nous  sachions  qu'il  est  tousiours  prest  pour  recevoir  nos  contracts,  et  pour  en  estre  tesmoin,  pour  gouverner  et  conduire  le  tout,  voire  quand  nous  y  procederons  en  droit  et  integrite.  Voila  donc  ce  que  nous  avons  a  noter.  Or  il  y  ha  maintenant  de  ceste  equite  que  garde  Moyse  quand  il  commande  aux  Rubenites  et  Gadites  de  venir  posseder  la  terre  avec  leurs  freres,  combien  que  desia  ils  eussent  leur  portion  outre  le  Iordain.  Par  ceci  nous  sommes  admonnestez  en  premier  lieu,  que  si  Dieu  nous  a  unis  en  un  corps,  il  ne  faut  point  qu'une  partie  se  retire  des  charges,  pour  dire:  Exemptons-nous,  et  laissons  faire  les  autres.  Mais  il  est  question  que  un  chacun  s'employe  en  commun  :  et  que  celuy  qui  pourroit  avoir  quelque  moyen  a  part,  ne  laisse  point  de  communiquer  avec  ses  freres,  et  de  prester  l'espaule  (comme  on  dit)  afin  de  porter  une  partie  du  fardeau.  Ceci  pourroit  estre  declare  plus  a  plein,  mais  il  suffira  d'en  avoir  un  recueil:  et  le  principal  est,  que  nous  le  puissions  bien  pratiquer.