35:688  nostre  Dieu  Eternel,  exauce  nous  a  cause  du  Seigneur,  dit  Daniel:  et  tant  souvent  aux  Pseaumes  cela  est  reitere.  Il  est  vray  qu'il  est  parle  de  David:  mais  c'est  a  cause  qu'il  estoit  figure  de  nostre  Seigneur  Iesus  Christ.  Et  puis  quand  Daniel  parle  ainsi,  A  cause  du  Seigneur,  il  monstre  bien  que  c'est  le  Redempteur  qui  avoit  este  promis,  et  duquel  la  venue  estoit  alors  prochaine:  Mais  Iesus  Christ  parle  plus  apertement:  et  dit,  Iusques  yci  vous  n'avez  rien  demande  a  mon  Pere  en  mon  nom  :  demandez  maintenant,  et  il  vous  sera  ottroye.  Comme  s'il  disoit,  Iusques  yci  vous  n'avez  point  cognu  que  mon  office  est  d'estre  Mediateur  envers  Dieu  mon  Pere  pour  vous:  et  de  faict  il  n'estoit  point  encores  monte  au  ciel,  il  n'avoit  point  mesmes  rompu  le  voile  du  Temple,  pour  nous  y  donner  acces.  Mais  maintenant  nous  y  avons  acces  prive,  d'autant  que  le  voile  du  Temple  est  rompu,  et  que  Iesus  Christ  est  entre,  non  point  en  un  sanctuaire  materiel  (comme  les  Sanctificateurs  du  temps  de  la  Loy)  mais  iusques  au  ciel  en  la  maieste  de  Dieu  de  son  Pere  pour  nous  y  faire  trouver  grace:  tellement  que  le  throne  de  Dieu  n'est  plus  un  throne  de  maieste  pour  nous  espovanter,  mais  il  nous  convie  doucement  et  d'une  bonte  paternelle,  d'autant  que  nous  y  venons  au  nom  et  par  le  moyen  de  ce  Sacrificateur  qu'il  nous  a  ordonne.  Voyla  donc  comme  l'intercession  do  nostre  Seigneur  Iesus  Christ  nous  est  tousiours  profitable:  et  nous  est  une  forteresse  invincible:  si  bien  que  quand  nous  viendrons  a  luy  nous  serons  tellement  exaucez  que  nous  sentirons  par  experience  que  quiconque  invoquera  le  nom  du  Seigneur,  sera  sauve.  Et  combien  que  ceste  sentence  du  Prophete  Ioel  ait  este  dicte  devant  que  Iesus  Christ  fust  apparu,  si  est-ce  que  les  fideles  du  temps  de  la  Loy  l'ont  tellement  pratticquee,  que  nous  devons  bien  mesmes  par  leur  exemple  estre  confermez  et  asseurez  maintenant  (nous,  di-ie,  qui  avons  la  perfection  et  l'accomplissement  de  tout  ce  qui  a  este  figure  sous  la  Loy),  que  quand  nous  viendrons  prier  et  invoquer  nostre  Dieu  au  nom  de  celuy  qu'il  nous  a  establi  pour  Advocat,  nous  sentirons  en  verite  qu'il  intercede  tousiours  pour  nous,  afin  que  nous  soyons  exaucez  en  toutes  nos  requestes.  Or  nous  nous  prosternerons  devant  la  maieste  de  nostre  bon  Dieu,  en  cognoissance  de  nos  fautes,  le  priant  etc.  Imprimerie  Eugen  Appelhans,  Brunsvic.