23:688  en  trouvera-on  de  cent  l'un,  qui  gouste  seulement  le  contenu  de  ces  mots.  Car  si  ces  trois  mots  ou  quatre  estoyent  bien  entendus  (Qu'Abram  a  creu,  et  qu'il  luy  a  este  repute  a  justice),  il  est  certain  que  toute  la  Papaute  seroit  abolie:  toutes  les  superstitions  qui  ont  auiourd'huy  la  vogue,  cesseroyent:  tous  les  debatz  que  nous  avons  a  discuter,  seroyent  appaisez.  Car  voici  la  clef  qui  est  pour  donner  ouverture  a  tout  ce  qui  est  requis  pour  nostre  salut:  voici  le  moyen  d'appointer  toutes  opinions  diverses:  voici  le  fondement  de  la  vraye  Religion;  brief,  voici  les  cieux  qui  nous  sont  ouvers,  quand  nous  aurons  comprins  ce  qui  est  ici  prononce  en  brief  par  Moyse.  Et  d'autant  plus  devons-nous  detester  ces  canailles  qui  sont  si  effrontez  d'oscurcir  une  clarte  si  grande:  comme  ceux  qui  disent  qu'Abram  a  este  repute  preud'homme,  et  que  c'a  este  une  vertu  a  luy  de  croire  a  Dieu  :  ces  chiensla  nous  doivent  bien  estre  abominables.  Car  voila  les  blasphemes  les  plus  enormes  que  Satan  [pag.  108]  puisse  desgorger.  Or  quant  est  des  Iuifs,  on  ne  s'en  doit  pas  encores  esbahir,  ils  n'ont  point  d'expositeur.  Il  est  vray  que  la  clarte  de  Dieu  reluit  assez  en  la  face  de  Moyse,  mais  ils  ont  le  voile  au  devant,  comme  dit  sainct  Paul:  ils  passent  donc  sur  ces  mots  sans  penser  ce  qu'ils  emportent.  Mais  ceux  qui  font  profession  d'estre  Chrestiens,  et  qui  ont  l'authorite  de  sainct  Paul,  pour  monstrer  que  ceci  veut  dire,  quand  ceux-la  despitent  encores  manifestement  Dieu,  et  qu'ils  combatent  comme  des  chiens  mastins  avec  une  telle  impudence  qu'on  voit  en  eux:  quelle  raison  y  a-il?  Ie  ne  parle  point  des  Papistes,  mais  il  y  a  de  ces  espris  diaboliques,  qui  se  diront  Chrestiens,  et  qui  mesmes  en  feront  profession  a  pleine  bouche,  qui  cependant  ne  laisseront  pas  d'estre  pires  beaucoup  que  les  Papistes.  Car  encores  en  toute  la  Papaute  si  en  est-on  la  venu,  que  les  hommes  selon  qu'ils  sont  damnez  devant  Dieu  et  maudicts,  ne  peuvent  obtenir  salut  que  par  le  moyen  de  la  foy.  Les  Papistes  confesseront  cela:  et  ces  canailles  abolissent  et  radent  tout,  comme  s'il  n'estoit  ici  rien  dit,  sinon  que  voila  Abram  qui  est  preud'homme,  et  c'a  este  une  vertu  a  luy  quand  il  a  creu  a  Dieu.  Cependant  voila  des  vilains  qui  voudront  estre  renommez,  et  s'attribuer  un  titre  de  Maistre  et  Docteur,  qui  neantmoins  sont  si  enragez  et  possedez  d'une  telle  rage,  qu'ils  veulent  [pag.  109]  tout  renverser.  Or  d'autant  plus  nous  faut-il  estre  attentifs  a  ce  qui  est  ici  contenu.  D'un  coste  Moyse  recite,  Qu'  Abram  a  creu  a  Dieu:  et  d'autre  coste  il  adiouste  que  ceste  croyance  ou  foy  luy  a  este  pour  iustice.  Or  nous  avons  en  premier  lieu  a  definir  ce  mot  de  Croire:  car  sans  cela  tout  s'escouleroit  aisement.  Et  voila  pourquoy  les  Papistes  sont  ainsi  entortillez  en  leurs  erreurs:  car  combien  qu'ils  confessent  en  partie