35:682  quant  le  nom  de  Dieu  vous  ayez  une  forteresse  invincible  en  la  vertu  et  intercession  du  Mediateur.  Et  sans  cela  il  n'y  a  nulle  esperance  de  salut,  vous  estes  tous  perdus  en  vos  pechez.  Cognoissez  donc  la  necessite  que  vous  avez  que  le  Fils  de  Dieu  soit  au  milieu,  et  qu'il  intercede  pour  vous,  et  face  office  de  Sacrificateur.  Voyla  pourquoy  notamment  le  Prophete  nous  a  appelez  yci  tous  iniques  et  transgresseurs,  ascavoir  afin  que  nous  cognoissions  que  la  porte  nous  est  fermee,  et  que  nous  ne  sommes  pas  dignes  d'approcher  de  Dieu:  mais  que  nous  sommes  tous  accablez  et  confus,  sinon  que  nous  ayons  la  du  tout  nostre  refuge:  car  sans  ce  remede  il  faut  que  nous  perissions  et  pourrissions  en  nos  povretez  et  miseres.  Or  quand  nous  sommes  ainsi  humiliez,  alors  nous  pouvons  venir  a  nostre  Seigneur  Iesus  Christ,  cognoissans  que  c'est  luy  qui  porte  la  Parolle  en  nostre  nom,  et  que  c'est  par  luy  aussi  que  nous  pouvons  franchement  nous  appeler  enfans  de  Dieu.  Quand  donc  nous  venons  prier  et  dire,  Nostre  Pere  qui  es  es  cieux,  il  faut  que  nous  recognoissions  que  nous  avons  les  bouches  pollues  quant  a  nous,  et  que  ne  sommes  pas  dignes  d'appeler  seulement  Dieu  nostre  Createur,  tant  s'en  faut  que  nous  devions  avoir  ceste  presomption  de  nous  tenir  pour  ses  enfans.  Mais  tant  y  a  que  nostre  Seigneur  Iesus  Christ  porte  la  parolle  pour  nous,  et  que  nos  prieres  et  oraisons  sont  sanctifiees  par  luy:  comme  il  est  dit  en  l'Epistre  aux  Hebrieux,  au  dernier  chapitre,  que  c'est  par  luy  que  nous  rendons  a  Dieu  les  sacrifices  de  louange  et  toutes  oraisons,  et  qu'il  est  nostre  Mediateur,  et  qu'auiourd'huy  en  son  Nom,  nous  invoquons  Dieu  nostre  Pere.  Pourtant  nous  pouvons  franchement  nous  glorifier  qu'il  nous  tiendra  pour  ses  enfans.  Voyla  comme  nous  avons  a  pratticquer  ce  passage.  Or  nous  voyons  comme  nostre  Seigneur  Iesus  a  verifie  cela,  priant  pour  les  siens,  comme  il  est  recite  au  17.  chapitre  de  sainct  Iehan,  Pere  sainct,  voyci  ceux  que  tu  m'as  donnez:  maintenant  ie  depars  du  monde.  Ie  les  ay  gardez,  et  nul  n'est  peri  d'entr'eux,  sinon  le  fils  de  perdition,  mais  ceux  que  tu  m'as  commis  en  charge,  ie  les  ay  preservez.  Maintenant  ie  prie  pour  eux,  et  non  seulement  pour  eux,  mais  pour  tous  ceux  qui  croiront  en  moy  par  leur  parolle.  Ie  ne  prie  point  pour  le  monde,  mais  pour  ceux  que  tu  m'as  donnez,  que  tu  les  benisses  et  les  sanctifies,  afin  qu'ils  soyent  un  avec  nous.  Quand  nous  voyons  que  le  Fils  de  Dieu  prie:  voire  que  luy,  qui  est  Dieu  eternel,  s'abbaisse  iusques  la  d'estre  comme  suppliant,  et  de  presenter  requeste  devant  Dieu  son  Pere  en  nostre  nom,  ne  devons-nous  pas  yci  recognoistre  une  bonte  infinie?  Et  en  premier  lieu  tousiours  il  nous  faut  retenir  ce  qui  a  este  dit:  c'est  a  scavoir  que  nous  ne  ferions  que  profaner  le  nom  de  Dieu  en  l'in-