35:680  voulu  prendre  nostre  place,  et  s'est  venu  rendre  entre  les  malfaiteurs,  afin  d'avoir  toute  reputation  d'ignominie  entre  les  hommes.  Voyla  comme  l'opprobre  de  nostre  Seigneur  Iesus  Christ  nous  esleve  en  haut,  afin  que  nous  soyons  exemptez  de  toute  condamnation,  et  que  le  peche  ne  nous  soit  plus  impute.  En  quoy  gist  nostre  salut,  sinon  que  nos  pechez  soyent  couvers  et  abolis?  Or  nous  ne  pouvons  pas  obtenir  cela  par  autre  moyen,  sinon  d'autant  que  le  Fils  de  Dieu  est  nostre  redemption,  comme  sainct  Paul  en  parle,  c'est  a  dire  qu'il  a  este  le  pris  et  le  payement  de  ce  que  nous  devions,  a  ce  que  maintenant  nous  soyons  quittes  et  absous.  Ainsi  donc  ce  n'est  point  sans  cause  que  le  Prophete  conioint  ces  deux  choses:  et  tousiours  nous  monstre,  comme  par  ci  devant  que  nous  avons  de  quoy  glorifier  nostre  Seigneur  Iesus  Christ,  en  ce  qu'il  s'est  expose  a  tout  opprobre,  voyans  le  fruit  que  nous  en  recevons.  Car  si  nostre  Seigneur  Iesus  Christ  eust  fait  seulement  cela  pour  monstrer  signe  d'humilite,  ce  seroit  une  chose  trop  maigre,  mais  c'est  a  ce  que  nous  trouvions  en  luy  ce  qui  nous  defaut,  et  que  ce  soit  le  remede  de  ce  qui  nous  pourroit  grever.  Quand  donc  nous  sommes  ainsi  reconciliez  a  Dieu,  et  que  nous  obtenons  iustice,  et  que  la  remission  des  pechez  nous  est  toute  certaine,  voyla  comme  nous  n'avons  plus  d'horreur  de  venir  a  nostre  Seigneur  Iesus  Christ,  combien  que  ce  qu'il  a  este  crucifie  emporte  quelque  honte  selon  le  monde  de  prime  face:  mais  nous  voyons  qu'il  n'a  pas  laisse  de  faire  ses  triomphes  de  Satan  et  de  peche,  voire  tellement  qu'il  nous  a  acquis  iustice,  et  a  efface  l'obligation  qui  estoit  contre  nous,  en  sorte  que  maintenant  nous  pouvons  venir  a  Dieu  avec  certain  tesmoignage  que  nous  sommes  iustes,  nous  pouvons  a  plene  bouche  nous  glorifier  de  cela,  au  lieu  qu'auparavant  il  nous  faloit  passer  condamnation  avec  toute  horreur.  Voyla  en  somme  ce  que  le  Prophete  nous  a  voulu  dire  derechef.  Apres  toutes  ces  choses  il  adiouste,  qu'il  a  prie  pour  les  iniques.  Notamment  ceci  est  adiouste,  pour  monstrer  que  Iesus  Christ  en  sa  mort  et  passion  a  eu  l'office  de  Sacrificateur:  et  sans  cela  aussi  nous  n'aurions  pas  tout  ce  qui  est  requis  pour  l'asseurance  de  nostre  salut.  Il  est  vray  que  d'autant  que  la  mort  et  passion  de  nostre  Seigneur  Iesus  Christ  est  le  sacrifice  par  lequel  nos  pechez  sont  effacez,  que  son  sang  est  nostre  lavement,  que  son  obeissance  est  pour  abolir  toutes  nos  rebellions,  et  nous  acquerir  iustice:  en  cela  nous  avons  de  quoy  nous  esiouir.  Mais  ce  n'est  pas  le  tout:  car  il  est  dit,  qu'en  invoquant  le  nom  de  Dieu  nous  serons  sauvez.  Mais  comment  pourrions  nous  avoir  acces  a  Dieu?  Quelle  hardiesse  sera-ce,  que  nous  le  venions  prier?  voire  que  nous  le  crions  a  plene  bouche