58:68  coste  (comme  i'ay  dit)  de  reprimer  tellement  nos  appetits,  voire  naturels,  et  qui  d'eux  mesmes  ne  sont  que  licites.  Mais  afin  qu'ils  n'ayent  point  d'exces,  ne  d'intemperance  :  avisons  (di  ie)  de  les  reprouver  et  donter,  tellement  qu'ils  ne  nous  destournent  iamais,  ou  empeschent  de  nous  renger  a  la  volonte  de  Dieu.  Voila  donc  en  somme  ce  que  nous  avons  a  retenir.  Or  ici  nous  voyons  que  Rebecca  a  eu  une  affection  mieux  reglee  que  son  mari.  Il  est  vray  que  tousiours  on  verra  (c'est  a  dire  le  plus  communement)  que  si  le  pere  aime  l'un  de  ses  enfans,  la  mere  adonnera  son  amour  a  l'opposite:  on  verra  ces  contentions-la  quasi  en  tous  mesmages,  Ainsi,  il  pourroit  estre  que  Rebecca  a  eu  quelque  ialouzie:  d'autant  qu'elle  voyoit  qu'Esau  estoit  prefere:  et  qu'elle  a  mieux  aime  Iacob,  d'autant  qu'il  n'estoit  pas  si  agreable  a  son  pere,  qu'il  n'avoit  point  telle  faveur:  mais  d'autant  que  nous  verrons  ci  apres  qu'elle  a  regarde  a  l'election  de  Dieu:  et  qu'elle  a  tousiours  retenu  ce  qui  lui  avoit  este  dit,  qu'il  faloit  que  Iacob  fust  prefere.  Y  ci  nous  avons  a  iuger  qu'elle  n'a  point  este  passionnee,  comme  les  femmes  qui  s'escarmouchent  a  l'encontre  de  leurs  maris,  quand  elles  voient  que  l'un  des  enfans  ne  sera  pas  si  estime,  qu'elles  s'adonneront  plustost  la.  Nous  n'en  pouvons  pas  ainsi  iuger  de  Rebecca:  et  pourquoy?  Car  nous  voions  (comme  i'ay  desia  dit)  qu'elle  s'est  tousiours  rapportee  a  Dieu  et  qu'elle  a  voulu  obeir  a  ce  qui  lui  avoit  este  prononce.  Elle  eust  desire  pour  certain  que  tous  ses  deux  enfans  eussent  este  reservez  en  l'eglise:  mais  d'autant  qu'elle  voit  que  l'un  en  est  exclud,  et  qu'il  n'y  a  que  le  moindre,  et  l'inferieur  que  Dieu  approuve:  elle  s'y  accorde.  Or  ici  nous  voions  que  nostre  Seigneur  quelquefois  permettra  que  ceux  qui  ont  plus  de  vertus  et  de  dons  de  son  saint  Esprit,  neantmoins  defaillent:  et  que  ceux  qui  n'ont  pas  este  encores  si  avancez  que  ceux-la  les  surmontent,  ie  di  en  quelque  endroit.  Car  si  nous  faisons  comparaison  d'Isaac  avec  Rebecca,  il  est  certain  que  lui,  aiant  este  institue  en  la  maison  de  son  pere,  aiant  receu  tant  d'instruction  des  son  enfance,  qu'il  avoit  une  Foy  plus  grande  que  Rebecca  en  general.  Or  tant  y  a  que  voici  un  acte  particulier,  auquel  il  defaut,  et  auquel  son  vice  se  descouvre,  et  cependant  Rebecca  laquelle  estoit  n'agueres  sortie  d'une  caverne  d'idolatrie:  comme  nous  savons  que  en  la  maison  de  son  pere  il  n'y  avoit  que  superstitions,  le  pais  estoit  corrumpu  du  tout  :  ceste  povre  femme  combien  qu'elle  n'ait  point  cogneu  Dieu  en  sa  ieunesse,  toutefois  est  si  bien  apprise  du  saint  Esprit,  qu'elle  surmonte  son  mari.  Or  pour  ceste  cause,  ceux  ausquels  Dieu  aura  tendu  la  main  de  bonne  heure,  et  lesquels  il  aura  eslevez,  pour  estre  comme  des  miroirs,  qu'ils  apprenent  tousiours  de  cheminer  en  solicitude.  Et  pourquoy?  Car  il  ne  faudra  qu'un