50:68  Metaphora  est  in  verbo  c  o  n  s  t  r  i  n  g  e  n  d  i  :  qua  notatur  fieri  non  posse  quin  quisquis  mirificum  illum  amorem,  quem  testatus  est  nobis  Christus  morte  sua,  vere  expendit  ac  reputat,  quasi  ei  alligatus  et  arctissimo  vinculo  constrictus,  se  in  illius  obsequium  addicat.  Si  unus  pro  omnibus  mortuus.  Notandus  diligenter  hic  finis,  ideo  mortuum  pro  nobis  esse  Christum,  ut  ipsi  nobis  moriamur.  Notanda  etiam  expositio.  Mori  nobis  esse  Christo  vivere  :  aut  si  velis  plenius,  renuntiare  nobis  ut  Christo  vivamus.  Nam  ideo  nos  redemit  Christus,  ut  nos  in  potestate  sua  haberet  tanquam  proprium  peculium.  Unde  sequitur,  nos  amplius  non  esse  nostri  iuris.  Similis  locus  est  Romanorum  14,  15.  Quamquam  duo  hic  distincte  ponuntur:  nos  in  Christo  mortuos  esse,  ut  omnis  ambitio  et  eminendi  appetentia  cesset,  nec  molestum  sit  exinaniri:  deinde  Christo  nos  debere  vitam  et  mortem,  quia  nos  sibi  prorsus  devinxit.  16.  Itaque  nos  posthac  neminem  novimus.  Nosse  hic  accipitur  pro  censere,  quasi  diceret:  Nos  secundum  externam  larvam  non  iudicamus,  ut  is  habeatur  praestantissimus,  qui  talis  apparet  in  speciem.  Sub  carnis  nomine  comprehendit  externas  omnes  dotes,  quas  homines  solent  in  pretio  habere:  et  in  summa  quidquid  absque  regeneratione  censetur  laude  dignum.  Quamquam  de  externo  fuco  (quem  apparentiam  vocant)  proprie  loquitur.  Et  quidem  alludit  ad  mortem  cuius  meminerat:  ac  si  diceret:  Quandoquidem  omnes  praesenti  vitae  mortui  esse  debemus,  imo  nihil  esse  in  nobis:  nemo  Christi  servus  aestimandus  est  a  carnali  excellentia.  Quin  etiam  si  novimus  Christum.  Sensus  est:  etiamsi  Christus  ad  tempus  versatus  fuerit  in  hoc  mundo,  et  agnitus  hominibus  in  iis,  quae  spectant  ad  conditionem  praesentis  vitae:  nunc  alio  modo  cognoscendus  est,  nempe  spiritualiter,  ut  nihil  mundanum  de  ipso  cogitemus.  Hoc  loco  abusi  sunt  fanatici  quidam,  qualis  est  Servetus,  ut  probarent  humanam  Christi  naturam  a  divinitate  nunc  absorptam  esse.  Sed  quantum  aberret  tale  delirium  a  mente  apostoli,  non  est  difficile  iudicare.  Neque  enim  hic  de  corporis  substantia  loquitur,  sed  de  externa  specie:  neque  dicit,  non  amplius  cognosci  a  nobis  carnem  in  Christo,  sed  inde  Christum  censeri  negat.  Tota  vero  scriptura  clamat,  non  minus  nunc  ^  gloriosam  vitam  Christum  obtinere  in  carne  nostra,  quam  in  ea  semel  passus  est.  Imo  sublato  hoc  fundamento,  tota  fides  nostra  corruit.  Unde  enim  spes  immortalitatis,  nisi  quod  eius  specimen  iam  in  Christo  habemus?  Sicuti  enim  inde  restituta  nobis  iustitia,  quod  in  natura  nostra  Christus  legem  implendo  inobedientiam  Adae  abolevit:  ita  etiam  inde  vita,  quod  naturae  nostrae  regnum  Dei,  a  quo  exsulabat,  patefecit,  et  eam  collocavit  in  coelesti  domicilio.  Ergo  nisi  carnem  Christi  nunc  agnoscimus,  perit  nobis